CERAMAH WALIMATUL KHITAN

CERAMAH WALIMATUL KHITAN
Oleh: Yudha H. Bhaskara, SHI
اَلسَّلاَمُ عَلَيْكُمْ وَرَحْمَةُ اللهِ وَبَرَكَاتُهُ
أَلْحَمْدُللهِ الْمُنْعِمِ عَلَى مَن أَطَاعَهُ وَاتَّبَعَ رِضَاهُ, أَلْمُنْتَقِمِ مِمَّنْ خَالَفَهُ وَعَصَاهُ, أَلَّذِيْ يَعْلَمُ مَاأَظْهَرَهُ الْعَبْدُ وَمَاأَخْفَاهُ, أَلْمُتَكَفِّلِ بِأَرْزَاقِ عِبَادِهِ فَلَا يَتْرُكُ أَحَدًا مِنْهُمْ وَلَايَنْسَاهُ, أَشْهَدُ أَنْ لَاإِلَهَ إِلَّااللهُ وَحْدَهُ لَاشَرِيْكَ لَهُ شَهَادَةَ عَبْدٍلَمْ يَخْشَ إِلَّااللهُ, وَأَشْهَدُأَنَّ سَيِّدَنَا مُحَمَّدًا عَبْدُهُ وَرَسُوْلُهُ الَّذِيْ اخْتَارَهُ اللهُ وَاصْطَفَاهُ, أَللّهُمَّ صَلِّ وَسَلِّمْ عَلَى سَيِّدِنَامُحَمَّدٍ وَعَلَى أَلِهِ وَأَصْحَابِهِ وَمَنْ وَالَاهُ, أَمَّابَعْدُ: فَقَدْ قَالَ اللهُ تَعَالىَ فِي الْقُرْأنِ الْكَرِيْمِ وَهُوَاَصْدَاقُ الْقَائِلِيْنَ: اَعُوْذُبِاللهِ مِنَ الشَّيْطَانِ الرَّجِيْمِ, بِسْمِ اللهِ الرَّحْمنِ الرَّحِيْمِ:
وَإِذْ تَأَذَّنَ رَبُّكُمْ لَئِنْ شَكَرْتُمْ لَأَزِيدَنَّكُمْ ۖ وَلَئِنْ كَفَرْتُمْ إِنَّ عَذَابِي لَشَدِيدٌ .. وَقَالَ النَّبِيُّ صَلَّى اللهُ عَلَيْهِ وَسَلَّمَ: الرَّجُلُ رَاعٍ عَلَى أَهْلِ بَيْتِهِ وَهُوَ مَسْئُولٌ عَنْهُمْ وَالْمَرْأَةُ رَاعِيَةٌ عَلَى بَيْتِ بَعْلِهَا وَوَلَدِهِ وَهِيَ مَسْئُولَةٌ عَنْهُمْ
صَدَقَ اللهُ الْعَظِيْمِ وَصَدَقَ النَّبِيُّ الْكَرِيْمِ وَنَحْنُ عَلَى ذلِكَ مِنَ الشَّاهِدِيْنَ وَالشَّاكِرِيْنَ…
رَبّىِ اصْرَحْلِى صَدْرِى وَيَسِّرْلِى أَمْرِى وَاحْلُلْ عُقْدَةً مِنْ لِسَانِ يَفْقَهُوْا قَوْلِى وَشَدِّدْ لِسَانِى وَاهْدِى قَلْبِى بِحَقِّ سَيِّدِنَا مُحَمَّدٍ صَلَّى اللهُ عَلَيْهِ وَسَلَّمَ
سُبْحَانَكَ لَاعِلْمَ لَناَ اِلَّامَاعَلَّمْتَنَا اِنَّكَ اَنْتَ الْعَلِيْمُ الْحَكِيْمِ
Sateuacana mangga tipayun pangluhung kaluhung kalayan kajembaran manah ti urang sadayana, hayu urang sami-sami ngucapkeun sukur ka Allah anu Maha ghafur… Puji ka Allah anu Maha Suci. Oge Puja ka Allah anu Maha Kawasa. Goreh nitis wanci mustarining ninggang mangsa, takdir teu tiasa dipungkir, qadar teu tiasa disinglar… Jauh dijugjug, anggang di teang, ngaleuk leungik ngabandayeut, ngembat-ngembat nyantang pindang.
Ngariung mumpulung, bongkok ngaronyok dina ieu pangaosan anu insya Allah pinuh ku rahmatna Allah SWT… Urang sami-sami bersihkeun niat urang hadir di ieu pangaosan, teu aya sanes iwal ti hoyong nyukcruk ilmu panemu, ngala pangabisa ilmu agama… Supaya tiasa ngaronjatkeun iman jeung taqwa anu aya dina hate urang ka Allah SWT… Pamugi ti kawit detening ati anu nyangkarub dina qalbu kalayan kauningaan manah anu ikhlas, urang sadayana ngalangkahkeun dua dampal sampean ti bumi masing-masing ka ieu bumi, seja thalab ilmu ti kawit dugika akhir, sing dijantenkeun amal shaleh anu tiasa jadi sampeurkeuneun urang engkin di yaumil qiyamah… Amin…
Oge urang ngado’a la Allah, pamugi sagala kasusah hirup urang di alam dunia ieu sing digampilkeun ku Allah SWT… Sagala pamaksadan jeung kahoyong urang mugi sing dikabulkeun ku Allah Azza wa Jalla… Sagala do’a urang mugi sing diijabah ku Allah… Anu gaduh kasulitan pamugi sing dipaparin jalan kaluar ku Allah SWT… Anu nuju teu damang pamugi sing didamangkeun deui ku Allah… Anu gaduh sametan pamugi sing dipaparin rezeki ku Allah anu seueur supaya tiasa ngalunasan sametanana…
Teu hilap shalawat sinareng salam urang sanggemkeun salamina ka jungjungan alam Nabiyina wa Rasulina Muhammadin SAW, oge ka para kulawargina, para sahabatna, para taabi’in, para taabi’ut taabi’in, para atba’ut taabiu’t taabi’in, ka para ulama salafus shalihin, ulama mutaqaddimin, ulama mutaakhirin, dugika urang sadayana anu hadir di ieu haflah anu masih keneh ngajagi kana sunah-sunahna Rasulullah SAW, pamugi urang sadayana engkin di Yaumil Jaza sing kengeng syafa’atul udzma ti mantena… Amin Ya Allah Ya Rabbal ’Alamin…
Anu ku sim kuring mulyakeun para almukarramun, para kyai, para ajengan, para asatidz, para ustadzaat anu tos ngorbankeun waktu jeung tanagina kangge nyaangan ieu komplek ku hidayahna Allah SWT… Anu pribados hormati shahibul bait pun raka sareng keluarga besarna… Anu tos janten wasilah sababiah dugika urang sadayana tiasa silaturahmi sareng para wargi sadayana… Hakekatna ieu teh ijin ti Allah SWT… Dugika urang sadayana dina siang ieu tiasa hadir dina acara tasyakuran walimatul khitan sareng tasyakuran tujuh bulanan shahibul bait…
Pamugi tasyakuran ieu sing janten sababiah keluarga shahibul hajat ngengengkeun kabarokahan ti Allah SWT, ziyadatul khair barokah teh… Sing ditambih-tambih ku Allah kasaean di ieu bumi… Rumah tanggana sing dijantenkeun rumah tangga anu sakinah, mawadah wa rahmah… Sing ditambih-tambih rezekina ku Allah SWT… Oge murangkalihna anu dikhitan sing dipanjangkeun yuswana, sing disehat wal afiatkeun dhahir sinareng bathina… Utamina sing dijantenkeun murangkalih anu shaleh, anu tiasa ngangkat derajat ibu ramana sanes ngan saukur di dunia, tapi oge di akhirat… Oge orok anu nuju dikandungna sing dipanjang yuswana ku Allah, sing disampurnakeun dhahir sinareng bathina, sing disalametkeun sareng digampilkeun dina proses kelahiranana… Ibu sareng murangkalihna oge sing disalametkeun… Amin…
Kitu oge urang sami-sami ngadoa ka Allah… Pamugi urang sadayana anu hadir di ieu haflah sing dipaparin murangkalih anu shaleh tur shalehah anu tiasa maparin syafaat ka sepuhna engkin di yaumil qiyamah… Amin Ya Allah Ya Rabbal’alamin…
Jaman kiwari para ibu… Hoyong gaduh murangkalih shaleh teh rada sesah… Tantangan jaman ayeuna makin dieu makin beurat, diacak-acak ku pergaulan, diruksak ku sinetron, dirajetkeun ku internet, dipepende ku game sareng musik… Acan deui serangan ti kaum orientalis, atheis, komunis, liberalis, kapitalis… Makana kacida bahayana murangkalih urang, lamun diantepkeun akhlakna teu dibekelan ilmu agama… Bakal hancur kalindes ku rusakna jaman… Seueur ayeuna sepuh anu gering nangtung ngalanglayung, dugika ragana seep ngemutan anu jadi anak, diganggayong hirupna sabab ngemutan akhlak anakna anu ruksak…
Benghar katingalina bagja dina urusan dunia, tapi nyatana hatena balangsak… sabab akhlak anakna tos ruksak… Kacanduan ku narkoba… Katingalina jiga bagja ti luar… Bumina luhur ngajulang, motor jeung mobilna mewah harerang, sawah jeung kebona lega ngabentang, acisna seueur di bank, kamamana naek pesawat terbang, daharna oge unggal poe jeung rendang… Tapi hatena balangsak sabab anakna unggal minggu kudu direhabilitasi kacanduan narkoba nepika tinggal kulit jeung tulang… Na’udzubillah…
Cilaka bu…. Lamun anak urang ngan sukses saukur sukses di dunia, tapi diakhirat jadi musuh jang kolotna… Ulah waka bungah lamun urang dibengharkeun ku anak, tapi taliti heula timana anak kengeng hartana, percuma benghar lamun akidah anak urang ditukerkeun jeung kamurtadan, kabagjaan di akhirat anu abadi ditukerkeun jeung kabagjaan dunia anu sementara… Dina berita, ayeuna budak SMA kelas hiji tos jadi PSK hical diri demi acis… Jadi korban pergaulan bebas… Ngan nyaeta kadang urang osok nyalahkeun ka murangkalih lamun tos kajadian, tapi urangna mineng kajongjonan… Ningali murangkalih dijemput gunta-ganti mobil, gunta-ganti motor teh kalakah bangga… Padahal eta teh bisa ngajadikeun urang cilaka… Loba kolot anu ngarasa isin lamun murangkalih istrina ngokok wae di bumi, malah ngarasa minder sabab dianggap teu payu… Padahal Islam mah ngajarkeun murangkalih istri kudu dibunian di bumi… Sanes diobral gonta-ganti anu ngajemput, gonta-ganti mobil, gonta-ganti motor….
Seueur jaman kiwari murangkalih anu mampu nyumponan sagala kabutuhan kolotna dina urusan dunia… Dibumian, dimobilan, dikebonan, disawahan… Tapi ternyata hasil zina… Atawa hasil ngical narkoba… Na’udzubillah… Di dunia kolotna mungkin bangga sabab anakna sukses loba harta, tapi inget di akhirat anak anu model kitu bakal jadi dodoja kanu jadi sepuhna… Bakal ngadudut sepuhna kana naraka… Sabab keur di dunia sepuhna teu daek nyaram anakna ngalakukeun dosa jeung maksiat… Kalakah jongjon malah ngiring menikmati hasil dosa anakna…
Ulah serab ku kabengharan di dunia para bu, sabab benghar di dunia mah relatif sifatna bu… Jalmi anu gaduh mobil hiji disebut benghar kunu teu gaduh mobil, tapi kunu gaduh mobil 100 eta jalmi anu gaduh mobil hiji teu aya nanaona… Sabab benghar mah relatif sifatna, tergantung anu nilai jeung anu ngajalani na…
Aya jalmi anu dianggap benghar ku batur, tapi ngarasa teu benghar… Sanes teu syukur ka Allah, tapi sabab ngarti harta anu dipimilikna teh ngan saukur sementara, sabab pasti sadayana bakal dicandak deui kunu gaduhna nyaeta Allah SWT… Lamun henteu hartana anu ninggalkeun jalmi… Jalmina anu bakal ninggalkeun hartana… Aya jalmi anu puluhan tahun kukumpul harta, tapi cukup sadinten ku Allah dimusnahkeun hartana langsung seep sabab bumina kahuruan… Eta harta anu ninggalkeun jalmi… Seueur jalmi anu puluhan tahun damel ngumpulkeun harta, tapi acan sempet menikmati kaburu maot manten… Harta anu dikukumpul ku manehanan ditinggalkeun teu aya anu dicandak ka kuburan… Sugan aya anu benghar mobil Alphard na ngiring dikubur? Teu aya… Eta i’tibar kangge urang, ulah hawek teuing kana urusan dunia, sabab urang sadayana pasti bakal papisah jeung harta anu dibanggakeun ku urang…
Tapi aya oge jalmi anu dianggap miskin ku batur manehna justru ngarasa benghar… Sanes adigung, tapi jalmi miskin ieu ngarti, yen sagala paparin ti Allah bade anu seueur, bade anu saalit kudu disyukuran… Kumaha carana? Carana qan’aah tea… Ridha kana sagala paparin ti Allah sanajan saalit… insya Allah jalmi anu qanaah mah sanajan hirupna katingali miskin ku batur, tapi moal bakal ngarasa kakurangan… Sabab dina hatena ditanamkeun rasa kacukup… Sabab bumi mewah, mobil mewah, kulah jeung sawah ngalayah teh sanes jaminan kebahagiaan para Ibu…
Ieu dicontoan ku Rasulullah SAW… bumina ngan saukur 5×4 meter, lantaina taneuh, tembokna tanah liat. Di bumi Rasulullah SAW mung aya hiji kamar ukuran 3×3,5m… Boro-boro aya Home Theater, Springbed, atawa meja hias tina marmer jiga urang. Tapi di kamar Nabi, ngan sakukur aya samak tina daun korma…Makana Sayidina Umar bin Khattab sempet nangis ningali Rasulullah SAW upami gugah kulem, sabab dina panangan sareng pipi Rasulullah SAW aya tapak samak… Tapi sanajan kondisi bumina jiga kitu, Rasulullah SAW justru ngarasa bumina teh lir ibarat surga kangge anjeuna… Baiti Jannati… Sabab tos ditanamkeun dina manahna qanaah ka Allah…
Margi para ibu, saenyana nikmat anu pang ageungna di alam dunia ieu teh sanes harta, sanes tahta, sanes wanita… Tapi iman… Sabab iman anu nyangkarub dina hate urang teh saenyana tiket urang lebet ka surga… Percuma benghar, hartana bro di juru bro di panto… Tapi dina hatena teu aya imanan… Tapi jalmi anu gaduh iman, sanajan iman na alit teu katingali jiga atom… Tetep bakal dilebetkeun ka surga ku Allah SWT… Sanajan kudu dikumbah heula dina naraka lamun urangna kotor ku dosa jeung maksiat…
يَخْرُجُ مِنْ النَّارِ مَنْ كَانَ فِي قَلْبِهِ مِثْقَالُ ذَرَّةٍ مِنْ إِيمَانٍ
Bakal dikaluarkeun ku Allah saha wae tina naraka anu masih keneh aya iman dina hatena sanajan saalit dzarrah… Ngan wayahna, lamun diri urang pinuh ku maksiat jeung dosa, dikumbah heula dina naraka… Ieu masalahna… Dikumbahna dina naraka… Lamun dikumbahna di Santa atawa di Cikundul mah leuheung… Kumargi kitu mempeung ayeuna urang masih keneh dipaparin kasempatan ku Allah hirup di dunia, seueurkeun ibadah, seueurkeun taubat ka Allah… Salami langit ngagantung keneh panto taubat masih keneh dibuka ku Allah SWT… Sakumaha seueurna dosa urang, maghfirah ampunan ti Allah pasti langkung seueur tibatan dosa urang…
Para ibu hadaniyallahu wa iyyakum ajmain…
Gaduh murangkalih teh rezeki ti Allah SWT… Salah sahiji anu tiasa masihan manfaat ka urang saatos pupus.. Selain ti amal jariah, ilmu anu diamalkeun… oge Waladun Shaalihun Yad’uu Lahu… murangkalih anu shaleh anu ngadoakeun urang saatos pupus… Kumargi murangkalih rezeki ti Allah, maka kedah disyukuran… Tapi syukur teu cekap ngan saukur ngaku dina hate eta murangkalih paparin ti Allah… Teu cukup ngan saukur ngucapkeun Alhamdulillah tos dipaparin murangkalih, Tapi kedah dibarengan fi’liyah-na…. Nyaeta didik murangkalih urang ka jalan anu dipikaridha ku Allah… Kumaha carana? Bekelan ku ilmu-ilmu agama.. supaya dewasana tiasa janten Waladun Shaalihun Yad’uu Lahu…. Eta karak namina syukur dipaparin murangkalih ku Allah…
Pan ayeuna mah Bu.. Seueur sepuh anu langkung melang anak hayamna can mulang ka kandang saatos maghrib, tapi lamun anakna can uih dugika subuh kalakah jongjon.. Enya dina hate sareng lisan mah ngucapkeun “Alhamdulillah… tos dipaparin murangkalih ku Allah..” Tapi dina praktekna.. Justru mineung ngantepkeun anakna indit peuting, balik subuh, nongkrong teu puguh… dibonceng ku saha wae, gentayangan di diskotik bari mabok jeung narkoba… Na’udzubillah… Sepuh anu model kitu berarti teu bersyukur dipaparin murangkalih ku Allah…
Padahal saur Allah dina Surat Ibrahim ayat 7, Laing syakartum la adzidannakum walaing kafartum innaa ‘adzaabii lasyadiid… Lamun anjeun syukur maka bakal ditambah eta nikmat ku Kami, Tapi lamun anjeun kufur teu syukur…. maka bakal diganti eta nikmat jadi azab anu beurat..
Ieu peringatan ti Allah.. Urang kedah bersyukur dipasihan murangkalih.. carana tadi, yakin dina manah eta murangkalih nikmat ti Allah, ucapkeun dina lisan Alhamdulillah tos dipaparin nikmat murangkalih.. didik murangkalih urang ku ilmu agama.. Jantenkeun murangkalih urang murangkalih anu shaleh sareng shalehah… Maka janji Allah la adzidannakum, bakal ditambah eta nikmat ku Kami… Seueur cara Allah nambihan nikmat ka jalmi anu syukur dipaparin murangkalih… Aya anu murangkalihna pang bangunkeun bumi, pang hajikeun, pang umrahkeun tina hasil harta anu halal… Eta salah sahiji cara Allah nambihan nikmat ka sepuh anu syukur dipaparin murangkalih…
Tapi lamun teu bersyukur.. teu ngadidik murangkalih urang ku ajaran Allah, maka ancaman Allah Inna ‘adzabi lasyadid… bakal digentos eta nikmat jadi adzab anu perih… Seueur ayeuna anu dibuktikeun di alam dunia ieu… Alitna tara dididik ilmu agama, maka dewasana eta murangkalih janten baragajulan… Tukang mabok, tukang rampok, tukang narik tali androk… Seueur ayeuna murangkalih anu tega maehan sepuhna, seueur murangkalih anu wani nyiksa sepuhna, seueur murangkalih anu wani ngarampok sepuhna…
Sepuhna teu damang, miwarang murangkalihna pang meserkeun obat ka warung, murangkalihna kalakah kabur momotoran, ibuna nuju nyapu di teras, murangkalihna asik nyoo hp, lain ngabantuan, kalakah miwarang deui ka ibuna, mah kamar payun can disapu… Bapana cape ngumbah motor, anaknya anu make motorna jang mejeng… Uih-uih motorna kotor deui, dikumbah deui ku bapana… Ieu ditingalikeun ku Allah di dunia kumaha akibatna lamun urang teu ngadidik agama ka murangkalih ti aalit… Dewasana bakal nyusahkeun urang…
Engkin di akhirat teh para Ibu… Murangkalih urang tiasa jadi anu nyalametkeun urang, oge tiasa jadi anu nyilakakeun urang… Lamun murangkalih urang shaleh, maka bakal nyalametkeun urang… Urang keur diseret ku Malaikat Malik bade dijebloskeun kana naraka, anak urang anu shaleh bakal ngajerit nyungkeun ka Allah supaya sepuhna dibebaskeun tina siksa naraka, “Gusti abdi teu ridha sepuh abdi anu keur di dunia sakitu capekna ngadidik abdi supaya jadi anak shaleh, nepika tiasa lebet ka surga ayeuna, tapi ku Gusti dilebetkeun kana naraka…” Akhirna sepuhna ngiring dilebetkeun ku Allah ka surga babarengan sareng murangkalihna anu shaleh sareng shalehah… Tapi sabalikna… Lamun anak urang thaleh… Tong boro-boro bakal jadi syafaat nulungan ka ibu ramana, justru di akhirat eta murangkalih bakal ngajongklokeun sepuhna kana naraka…
Mudah-mudahan urang sadayana anu hadir di ieu haflah, khususna shahibul hajat sing dipaparin murangkalih anu shaleh sareng shalehah… Amin… Tapi hoyong gaduh murangkalih anu shaleh sareng shalehah teu cekap ngan saukur ku doa… Tapi kudu dibarengan ku ikhtiar dhahir sinareng bathina… Ari hoyong gaduh murangkalih shaleh, tapi urangna teu daek usaha…
Kumaha atuh usahana? Didik murangkalih urang ku ilmu agama ti aalit… Didik kumaha carana tauhid ka Allah SWT… Kumaha carana ibadah, kumaha carana shalat, kumaha carana puasa, kumaha carana zakat… Ajarkeun rukun Islam anu pokok heula… Lamun sepuhna biasa ngadidik ti aalit, insya Allah engkin dewasana teu kudu cape miwarang deui… Ngan urang mah kadang nyaeta osok telat mimitina, murangkalihna tos buraong nembe riweuh milarian ustadz jang ngadidikna… anu aya sanes nurut kalakah meureupan…
Tapi lamun ngadidikna ti aalit… Lir ibarat ngabengkokeun tangkal awi… Lamun tangkal awi dibengkokeun timimiti pucukna keur jadi iwung keneh, ditalian kana taneh supaya ngeluk, sanajan ditinggalkeun tahunan, eta tangkal awi bakal tetep ngeluk nepika kolotna… Tapi lamun tangkal awi dibengkokeuna tos kolot… Komo lamun awina awi gombong… Lamun teu awina anu beulah, urangna anu bakal cilaka… Eta awi bakal ngabetrik kanu ngabengkokeunana… Seueur ayeuna kajadian murid ngalawan ka guruna, murangkalih ngalawan ka sepuhna… Sabab telat ngabengkokeuna, tos kaburu heuras…
Murangkalih ayeuna mah teu tiasa maen dipiwarang bu… Osok pinter ngabalikeun… Urang miwarang shalat, tapi urangna teu shalat… Osok dibalikeun… Kumargi kitu sateu acan miwarang shalat, urangna kudu tos biasa ngajaga shalat heula, saacan miwarang ngaos, urangna kudu tos biasa ngaos heula… Sabab soca murangkalih mah nuturkeun kabiasaan sepuhna…
Ulah nepika nitah ngaji, ari ibuna anteng nonton tipi. Bapana nya kitu deui, tara shalat jeung ngaji. Ibuna mun diajak ka pangajian, alasana nyeri sampean. Tapi bapana lamun nguping aya hiburan, jauh oge kukurusukan. Komo lamun aya musik dibarengan ku goyang, jauh oge diteang… Ari giliran masjid jeung mushala corengcang… Anu shalatna tiluan oge bari ejeung tihang… Murangkalih mah lir ibarat buah, muragna moal tebih tina tangkal… Janten shalehkeun heula sepuhna, insya Allah murangkalihna nuturkeun shaleh…
Dina Quran na oge: يَا أَيُّهَا الَّذِينَ آمَنُوا قُوا أَنْفُسَكُمْ وَأَهْلِيكُمْ نَارًا “Hei jelema anu ariman, salametkeun diri anjeun jeung keluarga anjeun tina seuneu naraka.” [At-Tahrim ayat 6]

Salametkeun heula diri urang tina naraka, shalehkeun heula urang… Karak tiasa nyalametkeun keluarga urang tina naraka… Ieu tanggungjawab urang sadayana anu janten sepuh… Urang gaduh tanggung jawab ka diri urang sareng ka keluarga urang… Sabab hirup di dunia mah teu tiasa nafsi-nafsi… Aya kawajiban anu kudu ditanggung ku urang…Urang moal tiasa lebet ka surga nyalira, bakal patula-patali antara sepuh jeung murangkalihna…
الرَّجُلُ رَاعٍ عَلَى أَهْلِ بَيْتِهِ وَهُوَ مَسْئُولٌ عَنْهُمْ وَالْمَرْأَةُ رَاعِيَةٌ عَلَى بَيْتِ بَعْلِهَا وَوَلَدِهِ وَهِيَ مَسْئُولَةٌ عَنْهُمْ رواه البخاري ( 7138 ) ومسلم ( 1829
“Pameget gaduh tanggung jawab ka keluarga anu aya di bumina, istri gaduh tanggung jawab ka caroge sareng ka murangkalihna, sadayana bakal disungkeun pertanggungjawabana.”
Kumargi kitu hayu urang sami-sami mekelan murangkalih urang sadayana ku ilmu-ilmu agama… Bekelan ku ilmu dasar anu aya dina rukun Islam… Tauhid ka Allah, shalat, puasa, zakat, sareng haji… Teras bekelan murangkalih urang ku iman… Kumaha carana?
Didik murangkalih urang percaya heula بِوُجُوْدِهِ …Percaya kana ayana Allah.. Ayana makhluk.. Ayana alam semesta, ayana urang.. berarti aya anu nyiptakeun nyaeta Allah… وَرُبُوبِيَّتِه …Percaya Allah hiji-hijina anu nyiptakeun urang, ngahirupkeun urang, anu ngamaotkeun jeung anu ngarezekian urang….وَأُلُوْهِيَّتِهِ. percaya kana Katuhanan-na Allah.. teu aya Ilah anu kudu disembah.. anu kudu di-ibadahan.. kecuali Allah.. وَوَحْدَانِيَّتِه …Urang percaya kana ka-Esaan Allah.. ka-Maha Tunggalan Allah.. وَاَنّهُ مُتَّصِفٌ بِكُلِّ كَمَالٍ Urang percaya Allah disifatan ku sifat kasempurnaan anu teu aya batasna.. وَمُنَزّهٌ عَنْ كُلِّ نَقْصٍ و مُحَاٍل Allah Maha Suci tina sifat kurang jeung sifat mustahil ka Allah..
Teras iman ka Para Malaikat, saha Malaikat teh? أَجْسَامٌ نُوْرَاِنيَّة هم Malaikat teh makhluk anu sifatna cahaya.. Allah nyiptakeun malaikat sanes jang ngabantuan Allah… Margi Allah mah teu butuh bantuan ti makhluk.. Allah mah ﻗِﻴَﺎﻣُﻪُ ﺑِﻨَﻔْﺴِﻪِ.. teu butuh kanu sanes… Malaikat diciptakeun ku Allah kangge “ngalaksanakeun parentah Allah”.. Malaikat mah لَايَعْصُوْنَ اللهَ مَا أَمَرَهُمْ وَيَعْمَلُوْنَ مَا يُؤْمَرُوْنَ Tara pernah maksiat kana naon wae anu diparentahkeun ku Allah.. jeung pasti midamel naon wae anu dipiwarang ku Allah…

Teras Iman kana Kitab-kitabna Allah.. Kumaha percaya kana Kitab-kitabna Allah teh? Nyaeta percaya jeung yakin Kitab Allah anu diturunkeun ka Rasulna teh.. Kalamullah.. Firmana Allah, sanes karangan Nabi, sanes karangan Rasul, sanes karangan Jibril atawa karangan makhluk sanesna… Janten pasti leresna… Moal mungkin ngabohongan moal mungkin ngabobodo…

Telah percaya ka Rasul-Rasulna Allah, nyaeta:

بِأَنْ تُصَدِّقَ أَنَّ اللهَ أَرْسَلَهُ مِنَ اْلخَلْفِ لِهِدَايَتِهِ مِنَ الطّريقِ الْحَقِّ وَأَنّهُ مُصَاِرفٌ بِجَمِيْعِ
مَاجَاؤُوْ بِهِ عَنِ اللِه تَعَالَى

“Nyaeta urang percaya Allah ngutus Rasul teh, kangge ngadugikeun hidayah ka urang sadayana, sareng percaya naon anu didugikeun ku Rasul eta dongkapna ti Allah Ta’ala”…
Teras iman ka Yaumil Akhir… Kumaha iman ka Yaumil Akhir teh? Nyaeta:
اَلْإِيْمَانُ بِكُلِّ مَاأَخْبَرَبِهِ النَّبِيُّ صَلَّ اللهُ عَلَيْهِ وَسَلَّمَ مِمَّايَكُوْنُ بَعْدَالْمَوْتِ
Urang percaya kana sagala anu diwartosan ku Nabi SAW kakait anu bakal terjadi saatos maot, naon wae bu? Aya fitnah kubur, pertanyaan Malaikat ka urang, aya nikmat sareng adzab kubur… Aya yaumil ba’ats, hari dibangkitkeun deui sadaya jalmi, aya shirat, aya hisab, terakhir bakal lebet ka mana urang engkin naha ka surga atawa ka naraka…
Terakhir تُؤْمِنَ بِالْقَدَرِ خَيْرِهِ وَشَرِّهِ و Iman kana Taqdir sae awona eta dongkapna ti Allah… nyaeta:

أَنْ تَعْتَقِدَ أَنَّ اللهَ قَدَّرَ اْلخيْرَ وَالشّرَّ قَبْلَ خَلَقَ اْلخَلْقَ أَنَّ جَمِيْعَ مَا كَانَ وَمَا َيكُوْنُ بِقَضَاءِاللهِ وَقَدَرِهِ
Urang percaya sapenuhna yen.. Allah tos nangtukeun kasaean jeung kaawonan urang.. sateu acan Allah nyiptakeun urang.. Sadayana anu atos terjadi atawa anu bade terjadi eta tos ditentukeun dina Qadha sareng Qadarna Allah SWT… Upami iman kana qadha sareng qadar ieu tos ditanamkeun manah murangkalih urang, maka dina hirupna bakal tenang jeung ikhlas bu… Moal aral kana nasib…
Para Ibu Rahimani wa rahimakumullah…
Naha cekap ngabekelan murangkalih urang ku iman hungkul? Teu acan bu… Sabab saur Imam Al-Ghazali dina Kitab Ihya ‘Ulumuddin, Iman teh masih buligir keneh makana kedah diacukan…
اَلْاِيْمَانُ عُرْيَانٌ لِبَاسُهُ التَّقْوَى وَزِيْنَتُهُ الْحَيَاءُ وَثَمرَتُهُ العِلْمَ
“Iman teh masih buligir, acukna taqwa, perhiasana kaisin, buahna ilmu.”
Jadi kedah diacukan iman murangkalih urang ku taqwa, naon taqwa teh?
اِمْتِثَالُ أَوَامِرِاللهِ وَاجْتِنَابُ نَوَاهِيْهِ اِبْتِغَائًا لِمَرْضَاتِ اللهِ تَعَالَى
Ngalaksanakeun sagala parentah ti Allah SWT, ninggalkeun tina sagala anu dilarangna, kalayan neda karidhaan ti Allah SWT… Tah diantara parentah Allah teh nyaeta syukur sareng khitan… Syukur teh parentah Allah, ayeuna shahibul hajat dipaparin rezeki ku Allah tiasa ngakhitan sareng bade gaduh deui murangkalih… Dibuktikeun rasa syukurna ku ngayakeun Acara Tasyakuran…
Anu dieusian ku macakeun ayat-ayat suci Al-Quran, tausiah agama, sareng doa’… Ieu maching namina… Mun ceuk bahasa bilaghah mah Muthabaqaatuhu li muqtadhal hal, maksud jeung tujuana sesuai… Shahibul hajat hoyong gaduh murangkalih anu shaleh, teras ngayakeun acara anu ngundang kana rahmatna Allah… Sabab kempelna urang sadaya sapertos ayeuna, saenyana nuju ngundang rahmatna Allah SWT:
وَمَا اجْتَمَعَ قَوْمٌ فِي بَيْتٍ مِنْ بُيُوتِ اللَّهِ يَتْلُونَ كِتَابَ اللَّهِ وَيَتَدَارَسُونَهُ بَيْنَهُمْ إِلَّا نَزَلَتْ عَلَيْهِمُ السَّكِينَةُ وَغَشِيَتْهُمُ الرَّحْمَةُ وَحَفَّتْهُمُ الْمَلَائِكَةُ وَذَكَرَهُمُ اللَّهُ فِيمَنْ عِنْدَهُ
”Jeung moal samata-mata kumpulna hiji kumpulan jalmi di bumi anu kalebet bumi-bumi Allah, dieusian ku maraca Al-Quran sareng sili ngajarkeun diantara manehna, iwal ketenangan bakal diturunkeun ka para jalmi anu aya di lebetna, rahmat Allah bakal nyimutan manehna, sareng malaikat ngurilingan ka sadaya jalmi anu aya di eta tempat, bari bakal disebut-sebut ku Allah dipayuneun (para malaikat) anu aya di sakuriling Allah.” [HR Muslim, 2699].

Insya Allah ayeuna rahmat Allah nuju nyimutan urang sadayana di bumi ieu… Amin… Nami-nami para ibu oge ayeuna nuju disebut-sebut di tengah para malaikat… Di komplek ieu para ibu mungkin teu terkenal, tapi dipayuneun para malaikat, para ibu anu rajin ngiring pangaosan bakal terkenal… Sabab teras-terasan disebut-sebut namina di payuneun para malaikat anu ngurilingan Allah…
Tapi hanjakalna aya oge sepuh anu nyunatan murangkalihna, tapi ngayakeun acarana justru ngundang laknat Allah… Dieusian ku hiburan anu pinuh ku maksiat jeung ngumbar aurat dina panggung, aya goyang ngebor, goyang gergaji, goyang palu, goyang konci inggris… Dipolototan ku barudak… Bari penonton dewasana parebut sili siku naek ka panggung hayang nganafkahan istri batur…
Nyawer bu… Pan nyawer teh nganafkahan istri batur… Ari ka istri sorangan di bumi papaehan ngaku teu gaduh acis, giliran nyawer meni asa pang loba duitna… Bungah saharitaeun… Beres hiburan balik ka bumi rieut deui pasea jeung istri sabab acis jang meser beas dianggo nyawer… insya Allah moal aya di komplek ieu mah nya bu….
Uih deui… Jadi bekelan murangkalih urang ti aalit tadi kunaon bu? Ku Iman sareng Taqwa… Alias Imtaq… Naha cekap mekelan ku Iman sareng Taqwa? Eta intina… Tapi dihiasan deui ku kaisin… Al-Hayaa u minal iman… Sanes isinan, tapi gaduh kaisin… Lamun isinan mah minder namina, itu isin, ieu isin… Tapi gaduh kaisin… Kaisin tina naon kaisin tina ngalakukeun dosa, isin maok, isin nipu, isin korupsi… Oge ajarkeun gaduh kaisin kana aurat na… Aurat teh asal kata tina ‘awara hartosna ‘aeb… Jadi kudu isin lamun ‘aib urang katingali ku batur… Ajarkeun kaisin ngabuka ‘aurat ka murangkalih urang… Pameget antara tuur dugika bujal… Istri mah sadayana ‘aurat iwal ti tapak panangan sareng penteu…
Atuh lamun kitu mah teu kengeng mereun diajar bahasa inggris, teknologi jeung ilmu-ilmu exact sanesna…? Kengeng bu… Islam teu ngajarkeun umatna bodo, teu ngajarkeun atawa kudet, kurang update, oge teu ngajarkeun gaptek, gagap teknologi… Belajar bahasa Inggris mangga, supaya teu dibobodo ku urang Barat… Lamun perlu mah diajar bahasa Yahudi sakalian… Sapertos Zaid bin Tsabit, sekretarisna Rasulullah SAW… Dipiwarang ku Rasullah SAW diajar bahasa Yahudi supaya tiasa paham kana strategi bangsa Yahudi… Ngan saukur 16 dinten bahasa Yahudi tiasa dikuasai ku Zaid bin Tsabit… Urang 16 taun diajar bahasa Inggris ngan saukur tiasa Welcome jeung No Smoking…
Murangkalihna bade sina diajar Bahasa naon wae mangga… Bade belajar teknologi atawa robotik mangga… Ulah nepika generasi penerus Islam barodo… Tapi emut, ilmu-ilmu anu kitu hukumna fardhu kifayah… Tapi lamun ilmu agama, utamina anu aya dina rukun Islam, eta hukumna fardhu ‘ain, wajib urang sadayana tiasa… Melek teknologi ayeuna mah suatu keniscayaan bu… Teu cukup ngaji kitab hungkul… Aya kisah Baheula aya santri anu taunan diajar kitab, pasantrena di gunung… Dina hiji waktu eta santri turun gunung dipiwarang ka kota… Dongkap ka kota… Lebet ka hiji gedung kudu naek lift… Bingung ieu santri, sabab nyangkana lift teh lamari… Tapi digigirna aya tulisan Open, atuh beuki bingung eta santri sabab saumur-umur karak ningali open anu sakitu badagna… Dipiwarang naek lift keukeuh alimeun, sabab apalna open teh paragi ngabeuleum kueh… Open leutik oge bisa nutungkeun kueh, komodeui open badag, manateuing tutungna lamun lebet kana eta open raksasa…
Keur ngalamun ujug-ujug aya turis bule ti eropa naek kana eta lift… Si santri ieu olohok, bade nyaram teu kaburu sabab panto liftna kaburu nutup… naek weh eta lift kaluhur gedung… Teu pira ngan 5 menit… Na ari barang turun deui liftna, panto lift muka… Anu kaluar sanes turis bule deui, tapi turis anu hideung meleukmeuk ti Afrika… Atuh ngagoak eta santri ningali eta turis, sabab nyangka turis bule tadi geus tutung gara-gara asup kana open raksasa… Insya Allah santri ayeuna mah teu aya anu jiga kitu nya bu… Ayeuna mah seueur pasantren modern, malah santri ayeuna langkung canggih tibatan barudak anu sakola di sakola umum… Bahasa Inggrisna jago, komputerna jago…
Para ibu Rahimani wa rahimakumullah…
Janten ajarkeun ibadah ti aalit ka murangkalih nya bu… Khitan teh nga-Islamkeun murangkalih, sabab anu ngabedakeun jalmi Islam atawa sanes diantarana disunatan atawa henteu… Khitan teh ibadah sanajan nyeri oge… Dina Islam ibadah kabagi tilu… Kahiji, Ibadah nikmat. Kadua, ibadah cape. Katilu, ibadah nyeri. Kahiji, ibadah nikmat… Naon wae tah ibadah nikmat teh? Diantarana tuang, ngaleueut jeung kulem… Tiasa jadi nilai ibadah lamun dilakukeuna sesuai jeung sunah Rasulullah SAW… Tuang nganggo panangan kanan, diawali ku maca bismillah sareng doa heula, liren sateuacan eungap… Eta ibadah sabab nurut kana sunah Rasulullah SAW, kanikmat kengeng pahala kengeng… Ngaleueut nikmat bu…? Ari nikmat mah sing kuring bade ngaleueut heula atuh… Ngaleueut teh sunahna sabari calik, sanes sabari tatih… Teras kulem, kulem nikmat teu bu? Nikmat… Lamun teu nikmat mah moal seueur jalmi anu milih sare tibatan thalab ilmu… Sunahna sateuacan kulem wudhu heula, teras maca doa, maca kulhu sareng falaq bin naas, ngadepna ka kanan, saena ka kiblat…
Rasulullah SAW mah tuang na saalit, kulemna saalit… sami jiga urang… Ngan urang mah saalitna dua kali… Saalit-saalit tuang… Saalit-saalit sare… Tuangna sangu lautna perkedel kentang, cuci mulutna roti, ngaleueutna bubur kacang… Makanan penutupna buras jeung leupet… Atuh diabetes… sabab karbhohidrat lebet sadayana… tungtungna saalit-saalit sare bakating ku eungapna…
Teras Ibadah anu capek nyaeta diantarana Haji… Aya anu namina Sa’i, aya anu namina thawaf jeung wukuf… Mudah-mudahan urang sadayana anu hadir di ieu haflah sing ditakdirkeun ku Allah tiasa angkat ibadah Haji ka Baitullah saenggalna… Hoyong ibadah haji bu? Hoyong teu dipasihan amalan supaya tiasa enggal angkat haji? Baca surat tanah, ical langsung setorkeun, insya Allah bakal enggal angkat hajina… Seueurkeun shalawat Hujjiyat… Nyungkeun ka Allah supaya ditakdirkeun tiasa angkat haji saenggalna…
Teras anu katilu ibadah nyeri, diantarana nyaeta dikhitan… Khitan teh syari’at Nabi Ibrahim AS anu diparentahkeun ku Allah supaya diteraskeun ku Rasulullah SAW…
ثُمَّ أَوْحَيْنَا إِلَيْكَ أَنِ اتَّبِعْ مِلَّةَ إِبْرَاهِيمَ حَنِيفاً وَمَا كَانَ مِنَ الْمُشْرِكِينَ
“teras Kami wahyukan ka anjeun (Muhammad): “Turutan syari’at Nabi Ibrahim anu hanif” jeung anjeuna teu kalebet jalmi anu syirik ka Allah.“ (An Nahl :123) Wallahu’amu bi muradihi…
Khitan teh ngajarkeun ibadah ka murangkalih urang, ngajarkeun kabersihan sareng kasucian. Supaya wiwisna teu nyesa… ieu penting sabab kaitana sareng ibadah… Shalat misalna, lamun urang teu suci tina hadats moal ditampi shalatna ku Allah… Koncina shalat teh suci tina hadats… Lamun masih keneh aya najis anu nyesa maka shalatna teu sah…
Luar biasana parentah khitan ieu para ibu… Aya penelitian di University of Quebec Kanada sareng George Washington University, ternyata khitan teh tiasa ngahindarkeun tina penyakit Kangker prostat sareng panyakit HIV. Dina penelitian sanesna, upami engkin si murangkalih engkin dewasa nikah gaduh istri, tiasa ngahindarkeun istrina tina panyakit kangker rahim… Ieu luar biasana syariat Islam… Urang kedah husnuz dzan ka Allah… Sabab moal samata-mata Allah miwarang hiji amal shaleh lamun teu aya manfaatna kangge urang salaku hambana…
Teras para Ibu Rahimakumullah…
Anu salajengna nyaeta, syukuran Tujuh bulan orok di kandungan, naha kedah disyukuri ku urang? Sanes ngan saukur Tujuh bulana… Lamun mampu mah malah unggal bulan urang kudu syukuran… Sabab proses kehamilan teh rezeki ti Allah SWT… Karunia ti Allah anu kudu dusyukuri ku urang sadayana… Syukur teh diparentahkeun ku Allah… Jadi ulah abong-abong teu dilakukeun di ku Rasulullah SAW, urang nyebut hiji amal sae sesat… Tapi ditaliti heula, amalan eta bertentangan teu jeung syariat Rasulullah SAW…? Kecuali acara syukurana dieusian ku maksiat, dieusian ku kamusyrikan… Dieusian ku nyanyi-nyanyi ngumbar aurat… Eta jelas haram… Tapi lamun acarana tasyakurana dieusian ku macakeun ayat-ayat suci Al-Quran, dieusian ku tausiah agama.. Kira-kira bertentangan teu jeung syariat Islam? Makana saur Imam Asy-Syathibi dina Kitab Al-‘Itishom:
صلى الله عليه وسلم وكل مالا يخالف الشريعة ليس ببدعة وان لم يفعله النبي
Naha osok aya anu syukuran opat bulanan? Naon dasarna? Dina haditsna disebatkeun opat bulan mimiti kahamilan, orok teu acan aya ruhan… Lebet bulan ka 4 nembe Allah niupkeun ruh ka jasad orok anu aya di kandungan ibuna… Eta sababna seueur para sepuh anu ngayakeun tasyakuran 4 bulanan, sabab nganuhunkeun ka Allah tos maparin ruh ka orokna… Haditsna kieu:
عَنْ أَبِي عَبْدِ الرَّحْمن عَبْدِ اللهِ بْنِ مَسْعُوْدِ رَضِي اللهُ عَنْهُ قَالَ : حَدَّثَنَا رَسُوْلُ اللهِ صَلَّى اللهُ عَلَيْهِ وَآلِهِ وَسَلَّمَ وَهُوَ الصَّادِقُ الْمَصْدُوْقُ : إِنَّ أَحَدَكُمْ يُجْمَعُ خَلْقُهُ فِي بَطْنِ أُمِّهِ أَرْبَعِيْنَ يَوْمًا نُطْفَةً ثُمَّ يَكُوْنُ عَلَقَةً مِثْلَ (رواه البخاري ومسلم)ذَلِكَ ثُمَّ يَكُوْنُ مُضْغَةً مِثْلَ ذَلِكَ ثُمَّ يُرْسَلُ إِلَيْهِ الْمَلَكُ فَيُنْفَخُ فِيْهِ الرُّوْحُ
Saenyana aranjeun dikumpulkan penciptaanana antara sperma sareng ovum dina patuangan ibuna dina waktu 40 dinten, terus jadi ‘alaqah sagumpal getih salami 40 dinten, terus jadi mudhghah sagumpal daging 40 dinten, terus diutus ku Allah Malaikat jang niupkeun ruhna. (Perawi : Abdullah bin Mas’ud, kitab : Mu’jam Asy-Syuyukh, jilid 2, hal 764, derajat hadits : Shahih)
Lamun orok urang dihirupkeun, tos ditiupkeun ruh ku Allah dina rahim umur 4 bulan, wajar teu lamun urang syukuran? Wajar teu lamun urang nganuhunkeun ka Allah? Lamun mampu ngaayakeun acara sapertos ayeuna, mangga ayakeun… Lamun teu mampu, cekap ngado’a di bumi masing-masing nganuhunkeun ka Allah SWT… Makana pami tos opat bulan, para ibu seueurkeun ngaos, sabab orok tos tiasa ngadangu… Sanes nyeueurkeun nonton sinetron…
Teras kumaha ari syukuran tujuh bulanan? Naon dasarna… Dina Quran surat Al-Ahqaaf ayat 15 dijelaskeun para ibu kakait waktu kehamilan:

وَوَصَّيْنَا الْإِنسَانَ بِوَالِدَيْهِ إِحْسَاناً حَمَلَتْهُ أُمُّهُ كُرْهاً وَوَضَعَتْهُ كُرْهاً وَحَمْلُهُ وَفِصَالُهُ ثَلَاثُونَ شَهْراً
“Kami perentahkeun ka jelema supaya bageur kanu jadi indung bapana, indungna ngandung dina kaayaan ripuh pisan, jeung ngalahirkeuna dina kaayaan ripuh (oge). Ti mimiti ngandung nepika nyapihna teh tilu puluh bulan…. [ila akhiril ayat]
Tafsirul ayat bil ayatna Quran Surat Luqman ayat 14:
وَوَصَّيْنَا الْإِنسَانَ بِوَالِدَيْهِ حَمَلَتْهُ أُمُّهُ وَهْناً عَلَى وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ
“Jeung Kami parentahkeun ka jelema (kudu bageur) kanu jadi indung bapana; indungna geus ngandung dina kaayaan leuleus anu kacida, jeung nyapihna dina dua taun. Kudu syukur anjeung ka-Kami jeung ka indung bapa anjeun, ngan ka-Kami anjeun balik.” (Qs. Luqman : 14)
Disebatkeun dina Surat Luqman… Nyapih teh dua taun… dua taun hartosna 24 bulan… Dina surat Al-Ahqaaf ayat 15 na disebatkeun ti mimiti ngandung, ngalahirkeun, dugika nyapihna 30 bulan.. Berarti lamun dipotong 24 bulan masa nyusuan dugika nyapih… Tinggal sesa 6 bulan… Naon maksudna…? Dina Kitab Tafsir Ibnu Katsir.. disebatkeun aya dua penafsiran…
Pendapat ka hiji saur Sayyidina Ali bin Abi Thalib karramallahu wajhah ثَلَاثُونَ شَهْراً ieu… Aqallul Hamli… Pang saalitna ngandung, sabab di usia kandungan 6 bulan janin tos sampurna, tos tiasa dilahirkeun… Tapi orokna disebut orok prematur… Tapi tos sampurna lamun lahir, sabab jasadna tos sampurna… Eta sababna lebet umur kandungan 7 bulan seueur anu syukuran… Sabab uninga jasad orok anu dikandung tos sampurna…
Tapi syukurana ulah anu aneh-aneh… Ngadamel sasajen dialungkeun ka laut misalna, atawa motong hayam hideung jeung hayam bodas diniatan jang tumbal… Haram eta mah… Ulah ngayakeun acara anu nimbulkeun kamusyrikan atawa kamaksiatan ka Allah SWT… Sabab eta sanes syukur, tapi kufur kana nikmat ti Allah SWT… Tapi dieusian ku amalan anu ngagaduhan nilai ibadah…
Teras Penafsiran anu Kadua… Nyaeta pendapat Imam Ibnu Abi Hatim, ulama ahli hadits sareng ahli fiqh.. Ditafsirkeun dua ayat tadi ku ilmu fikih… Nyaeta kakait parentah menyusui… nyandak pendapatna ti Ibnu Abbas RA… anu hartosna “Lamun hiji ibu ngalahirkeun hamilna 9 bulan, maka cukup menyusuana 21 bulan.. Lamun ngalahirkeun hamilna ngan 7 bulan, maka cekap menyusuina 23 bulan..” Janten etangan 30 bulan, disesuaikeun sareng masa kehamilan…
Jadi lamun usia kehamilan rata-rata 9 bulan… Maka masa menyusuina 21 bulan… Ah, beurat cenah nyusuan orok 21 bulan mah… Komo ayeuna mah osok aya ibu-ibu anu tos ngalahirkeun malah teu kaluar cai susuna.. Aya oge anu kaluar cai susuna.. tapi orokna teu tiasa ngenyot, dugika kedah diperes heula ngangge dot… Teu kedah hariwang.. sabab Islam mah agama anu sesuai sareng fitrah jalmi.. Dina Quran Surat Al-Baqarah ayat 233.. Allah SWT maparin opsi karinganan ka para ibu:
۞ وَالْوَالِدَاتُ يُرْضِعْنَ أَوْلَادَهُنَّ حَوْلَيْنِ كَامِلَيْنِ ۖ لِمَنْ أَرَادَ أَنْ يُتِمَّ الرَّضَاعَةَ ۚ وَعَلَى الْمَوْلُودِ لَهُ رِزْقُهُنَّ وَكِسْوَتُهُنَّ بِالْمَعْرُوفِ ۚ لَا تُكَلَّفُ نَفْسٌ إِلَّا وُسْعَهَا ۚ لَا تُضَارَّ وَالِدَةٌ بِوَلَدِهَا وَلَا مَوْلُودٌ لَهُ بِوَلَدِهِ ۚ وَعَلَى الْوَارِثِ مِثْلُ ذَٰلِكَ ۗ فَإِنْ أَرَادَا فِصَالًا عَنْ تَرَاضٍ مِنْهُمَا وَتَشَاوُرٍ فَلَا جُنَاحَ عَلَيْهِمَا ۗ
“Jeung para ibu sakuduna nyusuan anak-anaknya salami dua taun pinuh, jang saha wae anu hoyong nyampurnakeun nyusuanana. Jeung kawajiban bapa mere dahar jeung pakaian ka manehna ku cara anu ma’ruf. Hiji jelema moal dibere beban ku Allah iwal ti kasanggupanna. Ulah nepika hiji indung kasiksa kusabab anakna jeung ulah oge hiji bapa kasiksa kusabab anakna, ahli waris oge sakuduna jiga kitu. Lamun duanana hoyong nyapih (saacan dua taun) kalayan sili ridha jeung musyawarah (antara ibu jeung bapana), maka teu aya dosa jang duanana.,……….”
Janten para Ibu rahimakumullah… teu nanaon teu tiasa nyampurnakeun masa menyusui dua taun oge, asal kedah saling ridha, saling musyarawah heula antara ibu sareng carogena… Abdi mah hoyong langkung ti dua taun nyusuana? Para ulama “ngahegaekeun”.. hukumna mubah… Pendapat Imam Malik masa menyusui teh dugika 2 taun 2 bulan, Imam Hanafi malah langkung lami deui dugika 2 taun 6 bulan.. Mung saur Imam Al-Qurthubi “Nambihan atawa ngirangan tina dua taun eta, teu nanaon asal teu ngabahayakeun orok sareng ibuna..”
Tapi ternyata para ibu… Ieu tinjauan medis… Langkung lami nyusuan teh langkung sae… Margi masihan ASI teh.. salah sahiji cara anu tiasa ningkatkeun kecerdasan murangkalih.. Anu ngajantenkeun murangkalih pinter hakekatna Allah SWT… Tapi khitiar sababiyah, diantarana: 1.) Faktor Genetis atawa keturunan, 2.) Faktor Nutrisi atawa asupan gizi.. utamina ASI, 3.) Faktor Edukasi atawa pola pendidikan murangkalih, sareng 4.) Faktor Lingkungan.. Ngadukung henteu kana kecerdasan murangkalih…
Kunaon ASI tiasa ngadukung kana kacerdasan murangkalih? Sabab dina ASI anu dikaruniakeun ku Allah ka para Ibu teh.. menurut hasil penelitian ilmiah.. Aya zat kangge ngabentuk otak murangkalih, anu namina DHA.. singkatan tina Docasa Hexaenoic Acid.. dina ASI oge aya anu namina Omega3, anu diperlukeun pisan kangge kesehatan sareng pertumbuhan murangkalih..
Ayeuna WHO, organisasi kesehatan dunia, nganjurkeun masa menyusui teh 6 bulan eksklusif ASI hungkul, diteraskeun masa menyusui ASI sareng asupan makanan sanes dugi ka dua taun atawa langkung.. margi tos kabukti ASI tiasa ningkatkeun kacerdasan, sareng ningkatkeun daya tahan tubuh murangkalih, tiasa ngirangan alergi murangkalih… ieu luar biasana Islam, ti 1.400 kapungkur Islam tos ngajarkeun pentingna masihan ASI ka murangkalih dugi ka dua taun….
Ngan kade para ibu… Maparin ASI ka murangkalih teh ibadah, tapi ibadah kudu dilakukeun ku cara anu leres, bagian dada para ibu teh aurat, ulah abong-abong bade ibadah nyusuan murangkalihna… Dimana wae asal maen ngaluarkeun, asal kodok, burial, lol teu ditutupan… Dina angkot, di jalan raya, di mall maen kodok wae… Bisi seueur anu titajong sabab balangah… Tapi tutupan ku tiung atawa ku kain auratna… Ulah abong-abong ibadah, dina angkot maen ngaluarkeun wae, bisi diintip ku sopir angkot, engke bahaya angkotna bisi nyuksruk ka sawah sabab sopirna balangah…
Komo para Mahmud alias Mamah Muda… Ulah asal maen ngaluarkeun… Dosa eta teh ningalikeun aurat… Ari acan nikah meni ngajaga pisan… Pami aya nanaon pasti anu pangheulana dijaga, bagian dada… Dina bus pinuh, anu pang heulana dijaga pasti dada… Di pasar padedet, pasti anu pang payuna dijaga dada… Na ari beres nikah gaduh murangkalih, naha jadi dada anu jadi pang heulana dibuka…
Mudah-mudahan aya manfaatna.. Urang tutup ku doa…

hapunten bilih aya kata-kata anu kirang raos dina manah… Upami dina leresna eta samata-mata hidayah ti Allah, dina lepatna eta samata-mata kalepatan pribados… Pribados nyunkeun hapunten bilih salami ieu seueur kalepatan boh anu karaos atanapi anu teu karaos ulah teu dihapunten, kitu oge sawangsulna urang sili bebaskeun di dunia sareng di akhiratna.. Margi umur jalmi mah teu aya anu uninga.. ayeuna urang tiasa patepang enjing pageto saha anu terang…. Wal’afwu minkum… Wallahul muwaafiq ilaa aqwaamith thariq… Billahi taufiq wal hidayah..
السلام عليكم ورحمة الله وبركاته و