KAJIAN HADIR DI MAJELIS TAKLIM

KAJIAN HADIR DI MAJELIS TAKLIM
Oleh: Yudha H. Bhaskara, SHI
السلام عليكم ورحمة الله وبركاته
اَلْحَمْدُللهِ الّذِىْ خَلَقَ اْلخَلْقَ عَلَى اْلإِطْلَاقِ. فَاطِرِ السَّمَوَاتِ وَاْلاْرْضِ وَبَاسِطِ الاْرْزَاقِ. أَشْهَدُأنْ لَااِلَهَ اِلّااللهُ وَحْدَهُ لَاشَرِيْكَ لَهُ اْلمَلِكُ اْلخَلّاق. وَأَشْهَدُأنَّ سَيّدَنَامُحَمّدًاعَبْدُهُ وَرَسُوْلهُ اْلمَبْعُوْثُ لِتَتْمِيْمِ مَكَارِمَ اْلاْخْلاق. اَلّلهُمَّ صَلِّ وَسَلّمْ وَبَارِكْ عَلَى سَيّدِنَا مُحَمّدٍ اْلفَاتِح لِمَاأُغْلِقَ وَالْخَاتِمِ لِمَا سَبَقَ وَالنَّاصِرِالْحَقَّ بِالْحَقِّ وَالْهَادِى اِلَى صِرَاتِكَ الْمُسْتَقِيْمِ وَعَلىَ أَلِهِ وَأَصْحَابِهِ حَقَّ قَدْرِهِ وَمِقْدَارِهِ الْعَظِيْمِ
، أَمَّابَعْدُ
…رَبِّ اصْرَحْلِى صَدْرِى وَيَسِّرْلِى أَمْرِى وَاحْلُلْ عُقْدَةً مِنْ لِسَانِ يَفْقَهُوْا قَوْلِى
سُبْحَانَكَ لَاعِلْمَ لَناَ اِلَّامَاعَلَّمْتَنَا اِنَّكَ اَنْتَ الْعَلِيْمُ الْحَكِيْمِ

Para Bapak Jamaah Masjid Ad-Da’wah anu dirahmati Allah SWT
Alhamdulillah… dina wengi ieu urang sadayana masih keneh dipaparin nikmat yuswa, nikmat sehat terutama nikmat hidayah ku Allah SWT.. Dugika tiasa hadir deui di pangaosan mingonan di Masjid Jami’ Ad-Da’wah anu insya Allah dirahmati Allah SWT, mugia pangaosan urang ieu sing dijantenkeun pembuka kana Hidayah-Na Allah SWT… sareng tiasa ningkatkeun kataqwaan urang ka Allah SWT… Mugia tiap langkah para bapak ti bumi ka ieu masjid, anu caketna, anu tebihna sing dijantenkeun pahala ku Allah… Sareng digampilkeun jalan para Bapak lebet ka surgana.. Amin… Sakumaha janji Rasulullah SAW:
مَنْ سَلَكَ طَرِيقًا يَلْتَمِسُ فِيهِ عِلْمًا سَهَّلَ اللَّهُ لَهُ بِهِ طَرِيقًا إِلَى الْجَنَّةِ
“Sing saha anu papah angkat milarian ilmu, maka bakal digampilkeun ku Allah jalan ka Surgana.” (HR Muslim, 2699)
Sateuacan dikawitan.. Pribados bade nyunkeun hapunten… Bilih salami ieu seueur kalepatan… Boh anu karaos, komodeui anu teu karaos… Margi jalmi mah sanes malaikat anu salamina leres… Katambih ayeuna pribados tos rada mineng nyarios… anu hartosna makin seueur nyarios… makin seueur anu bakal dipertanggungjawabkeun engkin di akhirat ku pribados …
كُلُّ بَنِي آدَمَ خَطَّاءٌ وَ خَيْرُ الْخَطَّائِيْنَ التَّوَّابُونَ
“Sadayana anak Adam pasti sering ngalakukeun kesalahan “Pang sae-saena jalmi anu ngalakukeun kesalahan, nyaeta jalmi anu kersa taubat.” (HR. Ibnu Majah no. 4251)
Taubatna jalmi tina kasalahan anu dilakukeun ka jalmi… nyaeta nyungkeun hapunten ka jalmi deui… Taubatna jalmi tina maksiat sareng dosa ka Allah.. Istighfar nyungkeun ampunan ka Allah… Janten Meumpeung ayeuna masih keneh dipaparin waktos ku Allah kangge silih hapunten… Pribados bade nyungkeun dihapunten… Moal dienjingkeun bilih kabujeung ngantunkeun… kitu oge sawangsulna para Bapak teu kedah nyungkeun… Insya Allah ku pribados tos dihapunten…

Para Bapak Jamaah Masjid Ad-Da’wah Rahimakumullah….

Alhamdulilah urang sadayana nembe rengse ngalaksanakeun ibadah natepan Maghrib berjama’ah… Mugia amal ibadah Mahdhah urang… ti mimiti wudhu, adzan, iqamat, shalat… dugika i’tikaf ayeuna di masjid… sing ditampi ku Allah SWT… urang nyungkeun ka Allah mugia urang sadayana anu aya di ieu masjid sing di-Istiqamahkeun ku Allah dina natepan berjama’ahna… Margi natepan berjam’ah teh 27 derajat langkung utama daripada shalat nyalira:
صَلاَةُ الْجَمَاعَةِ تَفْضُلُ صَلاَةَ الْفَذِّ بِسَبْعٍ وَعِشْرِينَ دَرَجَةً
“Shalat berjamaah langkung utama daripada Shalat nyalira 27 derajat” (HR. Bukhari)
Oge sami-sami urang ngado’a ka Allah mugia urang sadayana anu hadir di ieu masjid… sing di-istiqamahkeun dina Thalab Ilmu-na… Urang do’akeun kapayuna… Mugia para wargi urang, para tatanggi anu dugika ka ayeuna teu acan keneh tiasa dongkap ka masjid… Sing digerakkeun hatena ku Allah… Supados tiasa darongkap minuhan ieu masjid ti lebet dugi ka luar… Amin…
Alhamdulillah… ayeuna oge tos pinuh… sanaos pinuhna di sisina hungkul… Bari anu hadirna oge para senior… Lamun dina main bola mah Para Pemain Inti… Engkin… Lamun aya Tahlilan anu aya amplopan… Nembe seueur Para Pemain bayaran anu dararongkap ka Masjid… Padahal saleresna kacida rugina jalmi anu teu dongkap ka Pangaosan… Bade Pangaosan di Masjid, Pangaosan di Majelis Ta’lim atanapi Pangaosan di Bumi anu dijantenkeun Majelis Ta’lim… Sanes rugi teu kengeng kue, kopi, atawa amplop…
Tapi rugi sabab saenyana Para Malaikat sareng rahmat-Na Allah SWT ngurilingan tempat anu aya pangaosan… ngurilingan para Jamaah anu ngiring ngaos di masjid, di Majelis Ta’lim sareng di Bumi anu dijantenkeun Majelis Ta’lim…… Percanten teu Pak? Ieu sanes saur pribados… Tapi saur Rasulullah SAW… Percanten teu kana naon anu diucapkeun ku Rasulullah SAW?… Alhamdulillah upami percanten… Berarti Rukun Iman-na masih lempeng keneh…
Saur Rasulullah SAW dina Hadits anu diriwayatkeun ku Imam Muslim… Jalmi muslim anu aya di tempat Pangaosan… Bade di Masjid, di Majelis Ta’lim, atanapi di Bumi anu dijantenkeun Majelis Ta’lim… Komo di Pasantren mah… Maka bakal dipasihan katenangan dina hatena ku Allah… Bakal dikurilingan ku para Malaikat sareng disimutan ku Rahmat-Na Allah SWT….
وَمَا اجْتَمَعَ قَوْمٌ فِي بَيْتٍ مِنْ بُيُوتِ اللَّهِ يَتْلُونَ كِتَابَ اللَّهِ وَيَتَدَارَسُونَهُ بَيْنَهُمْ إِلَّا نَزَلَتْ عَلَيْهِمُ السَّكِينَةُ وَغَشِيَتْهُمُ الرَّحْمَةُ وَحَفَّتْهُمُ الْمَلَائِكَةُ وَذَكَرَهُمُ اللَّهُ فِيمَنْ عِنْدَهُ
”Jeung moal samata-mata kumpulna hiji kaum di bumi anu kalebet bumi-bumi Allah (Diantarana Masjid, Majelis Ta’lim atanapi Bumi anu dijantenkeun Majelis Ta’lim), dieusian ku maraca Al-Quran sareng sili ngajarkeun diantara manehna, iwal ketenangan bakal diturunkeun ka para jalmi anu aya di lebetna, rahmat Allah nyimutan manehna, sareng malaikat ngurilingan ka sadaya jalmi anu aya di eta tempat, bari bakal disebut-sebut ku Allah dipayuneun (para malaikat) anu aya di sakuriling Allah.” [HR Muslim, 2699].
Malah dina hadis anu diriwayatkeun ku Imam Ahmad, Abu Daud, At-Tirmdzi, Ibnu Majah, sareng Ibnu Hibban, ti Abu Darda’ Radhiyallhu’anhu… Jangjang Malaikat teh disimpen di sakurilingeun jalmi anu nuju thalab ilmu… Sabab malaikat ridha kana naon anu dilakukan ku jalmi anu nuju thalab ilmu:

وَإِنَّ الْـمَلاَئِكَةَ لَتَضَعُ أَجْنِحَتَهَا رِضًا لِطَالِبِ الْعِلْمِ وَإِنَّهُ لَيَسْتَغْفِرُ لِلْعَالِـمِ مَنْ فِى السَّمَاءِ وَاْلأَرْضِ حَتَّى الْـحِيْتَانُ فِى الْـمَاءِ
“Saenyana Malaikat bakal nyimpen jangjangna kangge jalmi anu thalab ilmu… Sabab ridha kana naon anu dilakukeuna… Anu ngajarkeuna.. bakal dipangmentakeun ampunan ti Allah ku sadaya makhluk anu aya di langit sareng di di bumi… Dugika lauk anu aya dina cai oge ngiring nyungkuen ampunan ka Allah…”
Janten kamuliaan masjid, majelis ta’lim atanapi bumi anu dijantenkeun majelis ta’lim teh luar biasa…. Tiasa hadir di pangaosan oge luar biasa… Ulah dianggap biasa… Ku Allah bakal digampilkeun jalan ka surgana, dipasihan katenangan dina hatena, dikurilingan ku Malaikat sareng disimutan ku rahmatna Allah, bari dipang-do’akeun ampunan ku sadaya makhluk anu aya di langit sareng di bumi… sanes ku saurang dipangdo’akeuna… Tapi… kusadaya makhluk anu aya di langit sareng di bumi… Dugika lauk anu aya dina cai oge… ngiring nyungkeun ampunan ka Allah SWT….
Janten kauntungan ngiring pangaosan di Masjid teh luar biasa… Padahal modalna ngan niat hungkul angkat ka masjid… kantun calik… Ngupingkeun pangaosan… Bari disuguhan… Alhamdulillah.. Patuangan engap, hate kaeusian, kengeng rahmat ti Allah.. dikurilingan ku Malaikat… sareng dipangdo’akeun ampunan ka Allah kusadaya makhluk anu aya di langit sareng di bumi…! Eta teh sane saur pribados… Tapi saur Rasulullah SAW…
Ngan nyaeta Pak… Dugi ka ayeuna seueur keneh wargi urang anu langkung resep nongkrong di tempat karoke atanapi di warung kopi… daripada dongkap ka Pangaosan… Padahal Pangaosan ngan saminggu sakali ayana… Sanes ulah ngumpul di warung kopi… Ikhtiar Kasab mah… dianjurkeun pisan ku agama oge, mangga dipeseran sing pajeung… Ngan nalika dongkap waktuna Pangaosan… Gewat angkat ka Masjid ngiring pangaosan supados kengeng ilmu, kengeng katenangan dina hate, kengeng rahmat sareng ampunan ti Allah SWT, kengeng do’a na para Malaikat sareng sadaya makhluk anu aya di langit sareng di bumi… anu nyungkeun ampunan ka Allah kangge jalmi anu Thalab Ilmu…
Mudah-mudahan kapayuna pangaosan di Masjid Ad-Dawah ieu makin pinuh… wargi-wargi urang anu teu acan tiasa dongkap…. Insya Allah engkin seueur anu dongkap… Amin… Mudah-mudahan anu ngupingkuen pangaosan sareng anu ngadugikeuna… Sing dipaparin kabarokahan ku Allah… Boh kabarokahan dina ilmuna, kabarokahan dina kahirupanana, sareng kabarokahan dina sagala urusan dunia akhiratna… Amin Ya Rabbal’alamin…
Tapi kumaha supaya kengeng kabarokahan dina Thalab Ilmuna? Hadits Imam Muslim tadi masih keneh aya terasana nyaeta:
وَفَضْلُ الْعَالِـمِ عَلَى الْعَابِدِ كَفَضْلِ الْقَمَرِ عَلَى سَائِرِ الْكَوَاكِبِ. إِنَّ الْعُلَمَاءَ هُمْ وَرَثَةُ اْلأَنْبِيَاءِ لَـمْ يَرِثُوا دِيْنَارًا وَلاَ دِرْهَمًا وَإِنَّمَا وَرَثُوا الْعِلْمَ فَمَنْ أَخَذَهُ أَخَذَ بِحَظٍّ وَافِرٍ
“Kautamaan jalmi anu gaduh ilmu dibanding jalmi tukang ibadah tapi teu gaduh ilmu… Sakumaha langkung saena bulan tibatan bintang-bintang… Sabab saenyana ulama teh warisan para Nabi… Para Nabi tara ngawariskeun dinar jeung dirham, tapi ngawariskeun ilmu. Sing saha anu nyandak ilmu Para Nabi, maka saenyana, tos kengeng bagean anu pang seueurna.”
Dina Hadits riwayat Imam Muslim ieu disebatkeun… Para Ulama teh pewaris Para Nabi… Para Nabi tara ngawariskeun Dinar sareng Dirham, tapi ngawariskeun ilmu… Saha pewaris pertama ilmu Rasulullah SAW teh…? Pewaris pertama ilmu Rasulullah SAW nyaeta Khulafaur Rasyidin… Khulafaur Rasyidin teh sanes ngan saukur pejabat Politik jiga ayeuna, tapi oge ngarangkap Ulama…. Naha leres Rasulullah SAW ngawariskeun ilmuna ka Khulafaur Rasyidin?
Jawabana aya dina hadits anu diriwayatkeun ku Abu Daud sareng At-Turmudzi:
وَاِنَّهُ مَنْ يَعِشْ مِنْكُمْ فَسَيَرَى اِخْتِلَافًا كَثِيْرًا, فَعَلَيْكُمْ بِسُنَّتيِ وَسُنَّةِ الْخُلَفَاءِالرَّاشِدِيْنَ عَضُّوْا عَلَيْهَا بِالنَّوَاجِذِ
“Jeung saenyana sing saha anu umurna panjang maka bakal ningali seueur perbedaan pendapat dina masalah agama. Maka saur Rasulullah SAW: “Anjeun kudu uih deui ka Sunnah kuring… Sareng Sunnah Khulafaur Rasyidin, gegel sakuat-kuatna dua Sunnah eta..”
Janten Rasulullah SAW teh ngawariskeun ilmuna ka Khulafaur Rasyidin heula…. Khulafaur Rasyidin oge gaduh murid… Nyaeta ulama di kalangan Para Sahabat Nabi… diantarana Ibnu Umar, Ibnu Abbas, Ibnu Mas’ud, Abu Dard’a… jeung sajabina… Teras para ulama di kalangan Para Sahabat Nabi oge gaduh murid…Nyaeta Ulama di Kalangan Taabiien… Diantarana Ubaidillah bin Abdillah bin ‘Utbah bin Mas’ud, Salim bin Abdullah bin Umar, Al-Qasim bin Muhammad bin Abu Bakar Ash-Shiddiq… sareng sajabina…
Teras gaduh murid deui anu disebat ulama Taabi’ut Taabi’ien sapertos Imam Malik, Imam Abu Hanifah, Al-Auza’i sareng anu sanesna… Ulama kalangan Taabi’ut Taabi’ien oge gaduh murid anu disebat ulama Atbaa’ut Taabi’ut Taabi’ien… sapertos Imam Syafi’i, Yahya bin Sa’id Al-Qath-than… sareng sajabina… Upami disebatkeun sadayana bilih panjang teuing….
Singkatna dugi weh ka para Kyai Sepuh anu aya di pasantren-pasantren… Nembe pang buncitna dugi ka para Ustadz anu ayeuna aya di masjid-masjid… Janten kedah jelas ka saha guguruna… ayeuna mah nami Guru Agama teh seueur… Aya anu disebat Murabbi, aya anu disebat Mu’addib, aya oge anu disebat Mudarris…. Tapi hartosna mirip-mirip, intina mah sami “Anu Ngajarkeun atanapi Anu Ngadidikna”… Upami kapungkur mah… Para sepuh urang osok nyebatna teh Mu’allim…
Janten kedah jelas heula saha anu ngadidik ustadzna… Dimana Guguruna? Supados engkin pertanggungjawabana jelas… Urang kedah mulai kritis… Ulah asal nampi kana naon anu didugikeun ku jalmi anu ngaku ustadz… Margi Dakwah teh sanes ngan saukur asal ngadugikeun… Sabab urusana panjang engkin di Akhirat… Insya Allah ustadz di masjid Ad-Da’wah mah… jelas guguran ka saha… Pribados ngadongengkeun pangalaman nuju di Bima… Margi seueur jalmi anu ujug-ujug ngaku ustadz teras ngafir-ngafirkeun batur… Dugika ngahalalkeun darah batur sasama Muslim…
Para Bapak Rahimakumullah….
Aya sababaraha cara supados urang kengeng ilmu anu barokah… Diantarana Adab atawa Akhlak urang kanu janten Guru… Sabab tujuan utama diutusna Rasulullah SAW teh… Saenyana kangge nyampurnakeun akhlak anu mulia… Makana tadi di pembukaan ku pribados dibacakeun اْلمَبْعُوْثُ لِتَتْمِيْمِ مَكَارِمَ اْلاْخْلاق… anu diutus kangge nyampurnakeun akhlak anu mulia…
Dina hadits tadi dijelaskeun وَفَضْلُ الْعَالِـمِ عَلَى الْعَابِدِ كَفَضْلِ الْقَمَرِ عَلَى سَائِرِ الْكَوَاكِبِ Kautamaan jalmi anu gaduh ilmu dibanding jalmi tukang ibadah tapi teu gaduh ilmu… Sakumaha langkung saena bulan tibatan bintang-bintang “….
Ieu maksadna cahaya bulan langkung caang tibatan cahaya bintang-bintang… Hartosna Adab atawa akhlak urang kanu janten Ustadz, Kyai, atanapi Guru… Kedah langkung utama daripada Adab ka tukang ibadah anu teu gaduh ilmu…
Kapungkur kaleresan masantren 6 taun, 2 taun di Daaruttaqwa Cabang Gontor di Cibinong… 4 taun di Al-Masthuriyah Tipar Cisaat… Para Guru pribados di Tipar diantarana Almarhum KH. Fakhrudin Masthura, KH. Abdul Aziz Masthura, KH. Oman Qamarudin, KH. Dadun Sanusi, almarhum KH. Memed Sanusi, KH. Shalahuddin Fakhruddin Masthura sareng Kyai-kyai sanesna… Ti kapungkur para guru pribados… Nekenkeun pisan pentingna Adab kanu janten Kyai atawa ustadz…Istilahna Ngaji Rasa… sanes ngan saukur Ngaji Agama…
Hormat kanu janten kyai… ngahargaan kanu janten ustadz… Sanes berarti ustadz atawa kyai tara pernah salah… Namina jalmi pasti pernah ngalakukeun salah sabab sanes Malaikat, tapi ulah oge kabibina nepika disalahkeun terus sabab sanes iblis… Ulah gara-gara nila setitik rusak susu sebelanga…Ulah gara-gara cacad saalit, teras dianggap salah teu pernah bener salamina…
Ibaratna kieu Pak…, urang teh tos dipasihan kambing guling anu kacida raosna ku hiji jalmi dugika wareg, tapi nalika kambing gulingna bade seep ku urang…. Aya weh hiji keusik alit nyempil dina sesa daging kambing guling eta… Teras ngajekruk kana waos… Dugika urang ambek-ambekan… ijid ka eta jalmi… Ngagogoreng sabab tos nyuguhan Kambing Guling anu aya keusikan…
Tapi anu dicarioskeuna ngan keusikna hungkul… Sementara daging kabing guling anu tos seep dituang ku urang mah hilap… Malah nganggap teu aya.. Asa can pernah dipasihan daging kambing guling ku eta jalmi… padahal daging kambing gulingna tos wareg dituang ku urang… Maka eta namina Dzalim… Urang ulah dzalim ka saha oge… Komodeui dzalim ka ustadz anu tos ngahuapan urang ku ilmu-ilmu agama…
Mudah-mudahan aya manfaatna… Ulah ningali saha anu nyariosna… Tapi candak cariosan anu leresna, sakumaha para Bapak tara ninggali heula bujur hayamna… Lamun endog mah osok langsung diasakan atanapi dihuapkeun kana baham…. Hapunten bilih aya kata-kata anu kirang raos dina manah… teu aya niat anu sanes iwal ti Qul lilhaqqa walau kaana Murran… Ucapkeun anu leres sanajan pait rasana… Billahi taufik wal hidayah…. Wal ‘Afwu minkum…
السلام عليكم ورحمة الله وبركاته