Artikulasi antara Shalat, Thawaf  jeung Ka’bah

Artikulasi antara Shalat, Thawaf  jeung Ka’bah

Oleh: Yudha H. Bhaskara, SHI

السلام عليكم ورحمة الله وبركاته

الحَمْدُلِلهِ الَّذِيْ افْتَرَضَ عَلَى اْلقَادِريْنَ زِيَارَةَ بَيْتِهِ اْلحَرَاِم , َوجَعَلَ حَجَّهُ اِحْدَى أَرْكَاِن الْاِسْلَاِم , أَشْهَدُاَنْ لَااِلَهَ اِلَّااللهُ وحْدَهُ لَاشَرِيْكَ لَهُ الْمَلِكُ اْلعَلَّامُ , شَهَادَةً مُبَرَّأَةً مِنَ الشِّرْكِ وَالشُكُوْكِ وَالْأَوْهَاِم , وَأَشْهَدُ أَنَّ سَيِّدَنَا مُحَمَّدًاعَبْدُهُ وَرَسُوْلُهُ أَفْضَلُ مُرْسَلٍ وَأَكْمَلُ اِمَاٍم , أَلَّلهُمَّ صَلِّ وَسَلِّمْ عَلَى عَبْدِكَ وَرَسُوْلِكَ مُحَمَّدٍوَعَلَى أَلِهِ وَأَصْحَابِهِ اْلبَرَرَةِ اْلكِرَام وَاْلآئِمَّةِ اْلأَعْلَامِ. أمّابَعْدُ…: فَيَاأَيُّهَاالنَّاسُ اتَّقُوْااللهَ تَعَالَى وَاعْلَمُوْاأَنَّ اللهَ تَعَالىَ بَنَى دِيْنَ اْلاِسْلاَمِ عَلَى خَمْسَةِ أَرْكَاٍنٍ ,مِنْهَا حِجُّ اْلبَيْتِ ,فَمَنْ أَتىَ بِهِنَّ كَامِلَاتٍ فَقَدِاسْتَكْمَلَ اْلاِيْمَانَ

Jama’ah Jumah Rahimakumullah..

Alhamdulillah.. seueur wargi sareng, tatanggi urang sadayana anu ayeuna arangkat umrah.. Mudah-mudahan dina ngajalankeun ibadah umrahna sing disalametkeun ku Allah ti mimiti angkatna dugi ka uih deui ka bumina.. Sing dipaparin kakiatan ku Allah dina ngalaksanakeun sagala parukunan umrahna.. Engkin uihna sing dijantenkeun umrah anu mabrurah… Kitu oge urang sadayana anu hadir di ieu masjid mudah-mudahan sing dipaparin jalan ku Allah.. supados tiasa angkat umrah atanapi haji ka Baitullah.. nyampurnakeun rukun Islam anu kalima….

Dina khutbah Jumat ieu… Insya Allah pribados saalit bade ngabahas terkait “Ka’bah anu kakait sareng Akidah”.., mudah-mudahan tiasa makin ningkatkeun kataqwaan urang ka Allah SWT.. sareng makin nguatkeun akidah urang ka Allah, yen urang sadayana teh ibadah ngan saukur ka Allah..nyembah oge ngan saukur ka Allah..  teu aya hiji benda atawa makhluk lain anu disembah ku urang jiga agama sanes.. anu dugi ka ayeuna masih keneh nyembah tapekong atawa patung..

Tiap parentah ti Allah SWT anu tos diturunkeun melalui Rasulna Muhammad SAW pasti ngandung hikmah, ngan hikmahna teh aya anu tos dibukakeun ku Allah aya anu teu acan.. Aya anu tos dibukakeun ku Allah dina Al-Quran, aya oge anu kedah dibukakeun ku ilmu pengetahuan… Tapi kedah diyakinkeun dina manah, moal samata-mata Allah sareng Rasulna marentahkeun hiji amal Ibadah, upami teu aya hikmah dibalik ibadah eta… Misalna kakait Ka’bah.. Aya parentah Thawaf, Kunaon muterna kedah ka kiri teu ka kanan heula sareng kunaon jumlahna kedah tujuh putaran?”

Upami dijawabna 30 taun katukang.. Emut pribados kapungkur diwalerana ku pun guru..: “Sunahna ge geus kitu kuduna.. jadi kudu diturutan..” Ieu jawabana sanes lepat, tapi leres sesuai jawaban di waktu harita, margi memang leres dina ibadah Haji atanapi Umrah teh.. aya amalan anu teu tiasa dijelaskeun ku akal jalmi anu terbatas…. Tapi ayeuna Alhamdulillah tos kabuka… margi teknologi sareng ilmu pengetahuan ayeuna langkung maju daripada kapungkur…

Hebatna Islam.. makin maju ilmu pengetahuan.. justru makin seueur kebenaran ajaran Islam anu aya dina Al-Quran sareng Hadits Rasulullah SAW anu kabuka kebenarana.. ieu negeskeun yen Islam teh moal eleh ku ilmu pengetahuan komodeui ku tekhnologi.. Margi saenyana Islam anu ngalahirkeun ilmu pengetahuan sareng tekhnologi… Dina Al-Quran seueur dipendakan konsep-konsep saintifik terkait tekhnologi… Ayeuna seueur ayat-ayat Al-Quran sareng hadits-hadits Nabi anu terbukti kebenarana..

Dupina Allah SWT hoyong ningalikeun ka umatna.. bukti-bukti yen Islam teh leres agamana Allah.. anu Maha Uninga kana sagalana…  Umur Al-Quran ayeuna tos langkung ti 1.400 taun, tapi tara pernah katingaleun jaman… sabab dijaga ku Allah.. إنا نحن نزلنا الذكر وإنا له لحافظون …. “Saenyana Kami anu nurunkeun Al-Quran jeung Kami anu bakal ngajagana”… Terbukti ayeuna.. Seueur ayat anu tersurat dina Al-Quran, makin tersirat kebenarana di alam semesta..

Misalna jawaban pertarosan tadi, kunaon Thawaf muterna ka kiri ngalawan arah jarum jam, sareng jumlahna kedah tujuh putaran? Ieu kabuka ku teknologi, diantarana diciptakeun kapal luar angkasa sareng satelit.. Nepika jalmi tiasa ningali kumaha bentuk planet bumi sareng planet-planet sanesna anu aya di luar angkasa… Termasuk jadi uninga kumaha rotasi pergerakan planet di alam semesta ieu..

Ternyata terbukti… Dina rotasi planet bumi, muterna teh ka kiri jiga arah Thawaf… Makana Matahari terbenamna di Barat, jeung terbitna di Timur.. Maka terjadilah anu namina Siang sareng Wengi.. Bukti Al-Quran Mukjizat Nabi Muhammad SAW anu diturunkeun ku Allah.. ternyata 1.400 taun kapungkur.. Sateuacan aya kapal luar angkasa jeung satelit.. Rasulullah SAW tos dipasihan uninga ku Allah.. yen seluruh Alam semesta ieu diciptakeu muter dina porosna masing-masing.. jeung moal pahili antara garis edar hiji planet jeung planet sanesna…

Mangga dibaca dina Surat Yaasin ayat 37 dugi ka ayat 40.. Ku pribados nyobian diterjemahkeun kana bahasa sunda, dirujukna tina tafsir Ibnu Katsir..:

37وَآيَةٌ لَّهُمْ اللَّيْلُ نَسْلَخُ مِنْهُ النَّهَارَ فَإِذَا هُم مُّظْلِمُونَ

“Jeung hiji tanda kaagungan Allah jang manehna nyaeta pergantian peuting, Kami leupaskeun siang ti peuting, maka sakatika manehna kapoekan.”

38وَالشَّمْسُ تَجْرِي لِمُسْتَقَرٍّ لَّهَا ذَلِكَ تَقْدِيرُ الْعَزِيزِ الْعَلِيمِ

“ Jeung panon poe muter dina porosna nepi ka waktu anu geus ditangtukeun, sabab eta geus jadi katetapan Allah anu Maha Perkasa tur Maha uninga.”

39وَالْقَمَرَ قَدَّرْنَاهُ مَنَازِلَ حَتَّى عَادَ كَالْعُرْجُونِ الْقَدِيمِ

“ Jeung geus ku Kami tetapkeun poros peredara bulan aya tempat-tempatna, nepika balik deui jiga tandan kolot, nyaeta bentukna ti mimiti bulan purnama nepika bulan sabit.”

40لَا الشَّمْسُ يَنبَغِي لَهَا أَن تُدْرِكَ الْقَمَرَ وَلَا اللَّيْلُ سَابِقُ النَّهَارِ وَكُلٌّ فِي فَلَكٍ يَسْبَحُونَ

“Panon poe moal bisa ngudag ngelehkeun bulan, jeung peuting moal miheulaan siang, sabab masing-masing geus aya dina garis waktu peredarana.”

Ayeuna terbukti… Alam semesta ieu ternyata memang sadayana muter dina porosna.. ukuran Panon Poe jeung Bulan oge terbukti..  langkung ageung Panon Poe daripada Bulan.., makana putaran rotasi bulan.. jauh langkung gancang daripada Panon Poe, ieu sesuai sareng firman Allah SWT dina surat Yaasin ayat 40 tadi… لَا الشَّمْسُ يَنبَغِي لَهَا أَن تُدْرِكَ الْقَمَرَ Panon poe moal bisa ngudag ngelehkeun bulan…. Sabab putaran rotasi bulan langkung gancang daripada Panon Poe…

Dugika benda anu paling alit anu namina molekul, atawa anu langkung alit deui anu namina atom, proton, neutron, sareng elektron partikel elementer anu ngurilingan atom, terbukti sadayana muter sesuai arah muterna thawaf… Termasuk planet-planet anu aya di luar angkasa, sapertos planet bumi anu ditincak ku urang ayeuna.. Muter tiap dinten-na teh 360 darajat, lamina 24 jam, arahna sami jiga thawaf..

Jumlah 360 derajat  muterna bumi teh…  sami sareng 360 derajat sakali putaran thawaf di payuneun Ka’bah… anu ternyata jumlahna oge sami sareng sa-rokaat Shalat… Ti mimiti tatih 0 darajat, ditambih Ruku’ 90 darajat, ditambih Sujud 135 darajat, dikali dua sujud.. Jumlahna sami 360 darajat antara putaran bumi, thawaf sareng shalat… Sakumaha diuninga.. rukun thawaf  teh aya tujuh, jumlah hari dina saminggon oge aya tujuh..

Jiga kaleresan sami-sami jumlah putaran bumi, thawaf sareng shalat 360 darajat.. Oge jumlah rukun thawaf sareng jumlah hari dina saminggon sami-sami tujuh.. Ternyata ieu teh sanes kaleresan… Tapi I’tibar ti Allah ka hamba-hamba-Na anu berakal.. Thawaf ngurilingan Ka’bah saenyana ngalambangkeun kaimanan ka hiji Tuhan nyaeta Allah.. Sabab thawaf  teh ngabentuk hiji pusat lingkaran nyaeta Ka’bah.. Artina.. Allah hiji-hijina Rabb anu kudu disembah ku urang.. Lain urang nyembah Ka’bah jiga agama sejen anu nyembah tapekong…

Sabab akidah Islam mah.. Qul Huwallhu Ahad.. Hiji-hijina Ilaah anu kudu disembah ku urang… nyaeta Allah… Janten thawaf teh sakali deui… sanes mempertuhankeun Ka’bah.. Tapi Thawaf jadi ciciren ti Allah ka urang kudu tauhid… Praktekna nyaeta Shalat…. inget ka Allah dina sahari 24 jam, dina saminggu 7 hari… anu artina urang kudu tauhid ka Allah saumur hirup urang.. Kujalan ngalaksanakeun shalat fardhu anu lima waktu dina sahari..

Tapi kunaon dina shalat ngadepna kudu ka Ka’bah? Naha urang teh sujud nyembah Ka’bah jiga agama sanes anu nyembah tapekong? Sanes… Urang mah sujud nyembah ngan ka Allah anu hiji… Ka’bah mah ngan saukur arah kiblat.. supaya urang seragam dina shalat…, dalilna aya dina Surat Al-Baqarah ayat 142 dugika 149.. Mangga dibaca di bumi masing-masing.. upami teu ngartos “Fas aluu ahladz dzikri ing kungtun laa ta’lamun”…

Naon buktina Islam teu nyembah Ka’bah…? Buktina ti jaman Rasulullah SAW Ka’bah teh ditincakan.., Bilal bin Rabah ngumandangkeun adzan, naek kaluhureun Ka’bah.. berarti nincakan Ka’bah… Ayeuna oge upami kain penutup Ka’bah anu disebat kiswah digentos.. Waktu ngagentosna.. petugas di Mekah oge naraek ka luhureun Ka’bah.. berarti sami-sami nincakan Ka’bah…  Tong tebih teuing, di masjid oge Urang saenyana mineung nincakan Ka’bah.. Gambar Ka’bah dina sajadah mineung katincak ku urang…

Kunaon ieu didugikeun? Margi ieu kaitana sareng Tauhid.. Urang teh nyembah ngan ka hiji Allah anu Ahad.. Maha Tunggal.. Allah ulah sakali-kali dibayangkeun jiga Ka’bah.. ulah sakali-kali dibayangkeun Allah butuh Ka’bah… Kade tisoledat.. Sabab Allah mah saenyana teu butuh Ka’bah.. Ka’bah mah.. ngan saukur arah kiblat, supaya tiasa jadi pemersatu umat Islam di seluruh dunia.. terarah shalatna kahiji tempat anu namina Ka’bah..

Naon pentingna nentukeun arah dina shalat? Penting pisan… Sabab tabi’at jalmi mah.. osok hoyong paling benerna, upami teu ditangtukeun arah shalatna ku Allah jeung Rasul-Na, pasti tiap dongkap waktu shalat bakal aya kariweuhan.. Imam jeung Makmum bisa wae pasea kusabab teu sarua hoyong ngadep kamana -na.. Moal aya deui natepan berjamaah.. Sabab Imam-na hoyong ngadepna ka kulon, makmumna hoyong ngadep ka wetan.. anu aya pasea sadeana..

Janten ulah berlebihan teuing dina memperlakukeun Ka’bah.. kitu oge ulah berlebihan dina memperlakukeun Hajar Aswad.. Sayidina umar bin Khattab dina Shahih Bukhari dijelaskeun, nuju nyium Hajar Aswad.. dugika nyarios kieu..; “Kuring nyaho yen maneh ngan saukur batu anu teu bisa ngadatangkeun madharat atawa manfaat. Lamun kuring teu ningali Rasullah SAW nyium maneh, maka kuring pasti moal nyuim maneh”… Sakitu kerasna Sayidina Umar kana masalah Tauhid.. Pendapat Sayidina umar ieu teu pernah ditentang ku Rasulullah SAW.. Anu berarti pendapatna leres.. Janten ulah berlebihan memperlakukeun Ka’bah sareng Hajar Aswad.. sawajarna wae…

Naha cenah gagabah, pan aya dina Quran na oge nalika Raja Abrahah jeung pasukan gajahna rek ngancurkeun Ka’bah.. Justru datang manuk ababil nepika Abrahah jeung bala tentarana binasa, berart Ka’bah teh sakti? Kudu Istighfar… baca deui Al-Quran-na.. Sabab anu ngadatangkeun Manuk Ababil lain Ka’bah, tapi Allah anu ngirim Manuk Ababil nepika Abrahah binasa…

Ka’bah mah teu walakaya kecuali ditulungan ku Allah.. Buktina di zaman Nabi Nuh, Ka’bah rusak ka keuem ku banjir, dibangun deui di zaman Nabi Ibrahim.., di zaman Bani Quraisy Ka’bah kahuruan, tahun 681 masehi di zaman Abdullah bin Zubair Ka’bah kahuruan jeung rusak kusabab perang, taun 1630 Ka’bah keuna banjir, taun 1941 Ka’bah kabanjiran deui, terakhir di taun 2012 kamari kajadian deui banjir di Ka’bah..

Ieu saenyana I’tibar ka urang sadayana.. Panginten.. tos seueur jalmi muslim anu tisoledat dina tauhidna ka Allah.. Mungkin wae seueur jalmi muslim anu osok ngabayangkeun Allah teh Ka’bah… atawa tisoledat dina nuju shalat kabayang nyembah Ka’bah… Makana ku Allah ditingalikeun ka umatna… yen Ka’bah teh teu walakaya.. Sabab saenyana Ka’bah ayeuna mah bangunan anu dijieun ku jelema.. Mangga dibaca dina sejarah pembangunan Ka’bah.. Ka’bah teh tos sababaraha kali direnovasi…

Teras naon kaitana berputarna bumi, matahari, bulan jeung planet-planet laina anu aya di alam semesta ieu.. jeung tauhid ka Allah? Kumargi bilih panjang teuing.. Insya Allah urang bahas dina Jumat salajeungna… Mung kesimpulan anu tiasa dicandak tina khutbah ayeuna.., dina ibadah Haji atanapi umrah teh.. memang aya ibadah-ibadah simbolis.. anu kadang teu tiasa dipahami ku akal.. janten rahasia Allah sareng Rasul-Na.. Makana ibadah Haji dilebetkeuna dina posisi terakhir Rukun Islam..

Kahiji Urang Syahadat mengenal Allah sareng Rasul-Na heula, Kadua kuatkeun akidah sareng tauhid urang ka Allah.. ku ngalaksanakeun Shalat fardhu anu lima waktu, komodeui bari ditambihan shalat sunat, Katilu urang diajar ikhlas ngabagikeun harta anu dititipkeun ku Allah ka urang.. ku mayar Zakat, bade zakat fitrah, zakat mal atanapi zakat anu sanesna, Kaopat bentuk kasabaran urang… ku ngalaksanakeun ibadah puasa wajib, komodeui ditambihan puasa sunat …, tos kuat opat pondasi eta, Kalima angkat Haji kanu mampu, boh mampu dina materi, atawa mampu dina ngalaksanakeun parukunan-na… diniatan Lillahi Ta’ala… samata-mata sumerah diri ka Allah ngajalankeun parentahna… Ulah tisoledat kana kamusyrikan dina ngalaksanakeun ibadahna..

Mudah-mudahan aya manfaatna.. sing dihapunten bilih aya anu lepat.. Leresna eta hidayah ti Allah, dina lepatna samata-mata kabodoan pribados..

بارك الله لي ولكم فى القران العظيم ونفعفى واياكم بما فيه من الايات والذكرالحكيم فاستغفروه انه هوالغفورالرحيم.

KHUTBAH TSANI

الحمد لله رب العالمين وبه نستعين على أمورالدنيا والدين . أشهد أن لااله الا الله وحده لا شريك له ألمالك الحق المبين. وأشهد أن محمدا عبده ورسوله ألصادق الوعدالأمين. صلاة وسلاما دائمين متلازمين على أشراف المرسلين. سيدنا محمد وعلى أله وأصحابه الطاهرين المكرمين (أمابعد) فيا احوانى رحمكم الله. أوصيكم واياي بتقوى الله وطاعته لعلكم تفلحون.

فقال الله تعالى فى كتابه الكريم أعوذباالله من الشيطان الرجيم : (من يتق الله يجعل له مخرجا ويرزقه من حيث لا يحتثب). ان الله وملا ئكته يصلون على النبي. ياأيهاالذين أمنوا صلوا عليه وسلموا تسليما. أللهم صل وسلم على سيد نا محمد وعلى أله وأصحابه والتابعين وتابع التابعين لهم باحسان الى يوم الد ين و علينا منهم ومعهم برحمتك يا أرحم الراحمين . أمين يارب العالمين:

أللهم اغفرللمؤمنين والمؤمنات والمسلمين والمسلمات الأحياء منهم والأموات. اللهم أعزالاسلام والمسلمين وأهلك الكفرة والمشركين ولاتجعلناتحت أقدام المنافقين الفاسقين الظالمين. اللهم انصب فى بلادنا هذا اماما عادلاوبلادالمسلمين عامة انك على كل شيء قدير. أللهم ألف بين قلوب المؤمنين وفرق جمعية الكفروالمشركين بعنايتك ورحمتك يا أرحم الرحمين. أللهم اجعلنا وأولادنا من أهل العلم والخير ولا تجعلنا من أهل الشروالضير. أللهم ادفع عناالغلاء والوباء والفخشاء والمنكر والبغي والسيوف المختلفة والشدائد والميحان ما ظهرمنها وما بطن من بلادنا هذاخاصة ومن بلدان المسلمين عامة انك على كل شيء قدير. ربنا اغفر لنا ولاخواننا الذين سبقون بالايمان ولا تجعل في قلوبنا غلا للذين أمنوا ربنا انك رؤوف الرحيم . ربنا أتنا في الدنيا حسنة وفي الاخرة حسنة وقنا عذاب النار. سبحان ربك رب العزة عما يصفون وسلام على المرسلين والحمدلله رب العالمين.

عبادالله….. ان الله يأمركم بالعدل والاحسان وايتاء ذى القربى وينهى عن الفخشاء والمنكروالبغي يعظكم لعلكم تدكرون ولذكرالله أكبر.