Kajian Wudhu Dan Shalat

Kajian Wudhu Dan Shalat
Al-Faqir: Yudha H. Bhaskara, SHI

اَلسَّلاَمُ عَلَيْكُمْ وَرَحْمَةُ اللهِ وَبَركَاتُهُ
اَلْحَمْدُ للهِ الَّذِىْ فَرَضَ الصَّلَاةَ عَلَى عِبَادِهِ الْمُؤْمِنِيْنَ وَالْمُؤْمِنَاتِ , أَحْمَدُهُ سُبْحَانَهُ وَتَعَالَى وَأَسْأَلُهُ الْمَزِيْدَ مِنْ فَضْلِهِ فِى جَمِيْعِ الْأَوْقَا تِ , وَأَشْهَدُ أَنْ لَا اِلَهَ اِلَّا اللهُ وَحْدَهُ لَا شَرِيْكَ لَهُ شَهَادَةً تُنَجِّى قَائِلَهَا مِنَ الْمُهْلِكَا تِ ، وَأَشْهَدُ أَنَّ مُحَمَّدًا عَبْدُهُ وَرَسُوْلُهُ سَيِّدُ السَّادَاتِ، اَللّهُمَّ صَلِّى وَسَلِّمْ عَلَى سَيِّدِنَا مُحَمَّدٍ وَعَلَى أَلِهِ مَادَامَتِ الْأَرْضُ وَالسَّمَاوَاتُ، أَمَّابَعْدُ : فَيَا أَيُّهَاالنَّاسُ اَتَّقُوااللهَ يَغْفِرْ لَكُمُ الذُّنُوْبَ وَالزَّلّآتِ
Para Ibu Jama’ah Masjid Ad-Da’wah anu insya Allah dirahmati Allah SWT
Alhamdulillah… Kalayan rahmat sinareng nikmat ti Allah SWT.. urang sadayana enjing ieu tiasa deui ngalaksanakeun kawajiban tholab ilmu… anu mudah-mudahan tiasa makin ningkatkeun kataqwaan urang ka Allah SWT.. Shalawat sinareng salam urang dawamkeun ka jungjungan alam… Sayidina Muhammad SAW…
Insya Allah pribados moal bosen-bosen bade ngajak ka diri pribados nyalira… Anu mudah-mudahan katampi ku para ibu sadaya… hayu urang sami-sami ningkatkeun kataqwaan urang ka Allah SWT.. Kujalan ngalaksanakeun sagala parentah-Na… sareng ninggalkeun tina sagala anu tos dilarang ku Allah sareng Rasul-Na…
Mangga ayeuna keneh urang sami-sami taubat ka Allah SWT… Margi taubat mah kedah dienggal-enggal, ulah diengke-engke, bilih kabujeng janten bangke.. Ulah nanti jeung nanti, bilih kabujeng mati.. ulah oge kapan kapan bilih kabujeng dibungkusan ku kain kafan…:
وَسَارِعُوا إِلَىٰ مَغْفِرَةٍ مِنْ رَبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ
“Jeung geura aranjeun menta ampunan ka Allah… Kengengkeun surga anu legana salega langit jeung bumi… anu disayagikeun kangge jalmi-jalmi anu taqwa.” (QS. Ali Imran 133)
Para Ibu anu dimuliakeun Allah sareng Rasul-Na…
Kajian enjing ieu insya Allah urang ngahanca kakait Shalat… Mung sateuacana hapunten pisan, pribados teu aya maksad hoyong mamatahan ngojay ka meri… Sabab pribados oge ngaji diri… Sateu acan pribados mulai shalat, para ibu, para sepuh pribados anu aya di ieu masjid… Pasti tos langkung tipayun ngalaksanakeun shalat… malah nalika pribados masih maen kaleci keneh, para ibu pasti tos pangalaman dina shalat…
Janten sakali deui ieu mah sanes hoyong mamatahan ngojay ka meri… Ngan ieu mah etang-etang urang sami-sami ngamuthala’ah deui kana naon anu atos dipelajari ku urang… Kahiji meureun pribados kedah nganunaikeun kawajiban salaku pengurus DKM… Kadua mudah-mudahan… Naon anu didugikeun tiasa manfaat sareng tiasa diajarkeun ka murangkalih urang… Margi ngajarkeun shalat teh memang diparentahkeun ku Rasulullah SAW:
مُرُوْا أَبْنَائَكُمْ بِالصَّلَاةِ لِسَبْعِ سِنِيْنَ، وَ اضْرِبُوْهُمْ عَلَيْهَا لِعَشْرِ سِنِيْنَ
“Parentahkeun anak-anak anjeun Shalat dina umur tujuh taun.. lamun umur sapuluh taun acan daek keneh shalat.. Maka gebug..” (HR. Abu Daud sareng At-Tarmidzi)
Tapi kade pisan… Makna gebug dina hadits ieu… kedah puguh heula ameh henteu menyesatkeun… Bilih engkin Islam dianggap agama anu ngalegalkan kekerasan ka murangkalih… teras dituntut ku KPAI… Ma’na digebug dina hadits ieu nyaeta… Dharbun ghairu Mubarrih, gebugan anu teu aya tapakan dina badan…
Ngagebugna sanes kana organ vital, sanes kana peunteu, komodeui deui lamun ngagebugna nimbulkeun cacat saumur hirup dina fisik murangkalih urang… Sanes ngagebug model kitu… Komo lamun ngagebug murangkalih ngan saukur gara-gara pasea jeung caroge.. Murangkalih teu apal nanaon jadi sasaran digebugan ku urang… Teras kumaha Dharbun ghairu Mubarrih teh?
Urang contoan Emut ka pun rama kapungkur, Almarhum pun bapa Abas Bhaskara… Urang pang do’akeun sakedap… “Allahumaghfir lahu warhamhu wa’aafihi wa’fu ‘anhu, Wa akrim nuzulahu, wa wasi’ madkhalahu, waj ‘alil jannata ma-wahu… Allahuj’al qubrahu raudhahu min riyaadhil janaan walaa taj’al qubrahu min khufratin niiran…” Amin Ya Rabbal ‘Alamin…
Kapungkur nuju alit… Upami pribados teu shalat, tos disiapkeun hoe tilas kamoceng… Disimpena di luhur lamari… Tapi sanes kangge ngagebug badan pribados… tapi kangge ngagebug korsi anu biasa dicalikan ku pribados nalika nonton tipi… Lamun telat shalat, hoe langsung ngalayang kana korsi … Jelepet…. kapungkur mah korsina teh tina kulit imitasi tea… Tarik sorana Bu… Teu keuna kana badan tapi efekna alhamdulillah… Korsi digebug… Badan pribados langsung lumpat ka cai teras shalat… tah ieu contoh Dharbun ghairu Mubarrih… gebugan anu teu aya tapakan dina badan…
Urang memang dituntut kedah tegas ngajarkeun shalat ka murangkalih urang… Sabab engkin di Yaumil Qiyamah… Urang bakal dihisab ku Allah naha ngajarkeun shalat atawa henteu ka murangkalih urang… Murangkalih urang oge bakal jadi dodoja ka urang engke di akhirat lamun teu pernah diajarkeun shalat… Shalat wajib diajarkeun sabab shalat teh amal anu pang payuna bakal dihisab engkin di Yaumil Qiyamah…:
إِنَّ أَوَّلَ مَا يُحَاسَبُ بِهِ العَبْدُ يَوْمَ القِيَامَةِ مِنْ عَمَلِهِ صَلَاتُهُ فَإِنْ صَلَحَتْ فَقَدْ أَفْلَحَ وَأَنْجَحَ وَإِنْ فَسَدَتْ فَقَدْ خَابَ وَخَسَرَ.
“Saenyana pang mimitina amal hiji hamba anu bakal dihisab di poe qiamat… Nyaeta Shalatna… Lamun shalatna alus, maka bakal kengeng kauntungan sareng kasalametan… Lamun shalatna rusak, maka manehna bakal hanjakal jeung rugi.” (diriwayatkeun ku Imam Abu Daud no. 864, Imam Ahmad 425, Imam Al-Hakim 262, sareng Imam Al-Baihaqi, 2: 386)

Kumargi kitu urang salaku sepuh, gaduh kawajiban ngajarkeun shalat ka murangkalih urang… Shalat anu model kumaha? Shalat anu sesuai jeung ajaran ti Rasulullih SAW:

صَلُّوا كَمَا رَأَيْتُمُونِي أُصَلِّي
“Aranjeun kudu shalat sakumaha aranjeun ningali shalat kuring..” (HR.Bukhari no.6705)

Kunaon make kudu sesuai jeung tuntunan ti Rasulullih SAW? Sabab tong boro-boro shalat anu jadi induk amal ibadah…, ibadah naon wae lamun dilakukeuna teu sesuai jeung tuntunan ti Rasulullah SAW maka bakal ditolak…:
عَنْ عَا ئِشَةَ رَضِيَ اللهُ عَنْهَا قَالَتْ: قَالَ رَسُوْلُ اللهِ صَلَّى اللهُ عَلَيْهِ وَسَلَّمَ: مَنْ أَحْدَثَ فِي أَمْرِنَا هَذاَ مَا لَيْسَ مِنْهُ فَهُوِ رَدٌّ-متفق عليه-
“Ti ‘Aisayah Radhiyallahu ‘anha: Rasulullah SAW nyarios: Sing saha anu nga-aya-aya dina urusan agama kami, anu teu aya tuntunan ti Kami..” Saur Rasulullah: “maka eta bakal ditolak.” (HR. Muttafaq ‘Alaih)
Jadi naon wae anu aya kaitana jeung urusan ibadah… Kudu aya rujukan dasar dalil syar’i-na… Tah ieu jawaban tina hadits:
فَاِنَّ خَيْرَالْحَدِيْثِ كِتَابُ اللهِ وَخَيْرَالْهَدْىِ هَدْيُ مُحَمَّدٍ صَلَّى اللهُ عَلَيْهِ وَسَلَّمَ وَشَرَّالأُمُوْرِ مُحْدَثَاتُهَا
“Saenyana pang sae-saena caritaan nyeta Kitab Allah Al-Quran, jeung pang sae-saena pituduh nyeta pituduh Nabi Muhammad SAW. Pang goreng-gorengna perkara anu diaya-ayakeun.”
Ditambihan dina riwayat Imam An-Nasa’i:
وَكُلُّ ضَلَالَةٍ فِي النَّارِ
“Satiap kasesatan ayana di lebet neraka.”
Disebatkeun tadi… وَشَرَّالأُمُوْرِ مُحْدَثَاتُهَا “Pang goreng-gorengna perkara anu diaya-ayakeun”…. Sementara dina hadits ti Aisyah… مَنْ أَحْدَثَ فِي أَمْرِنَا هَذاَ مَا لَيْسَ مِنْهُ فَهُوِ رَدٌّ “Sing saha anu nga-aya-aya dina urusan agama kami, anu teu aya tuntunan dasar dalil syar’ina maka eta mardud atawa ditolak.”
Jadi anu bid’ah teh anu teu aya dalilna… Dalil syar’i dina Islam aya opat… Kahiji Al-Quran, kadua Hadist jeung Sunnah, katilu Ijma’, kaopat Qiyas…. Jadi jama’ah masjid Ad-Da’wah mah ulah tuturut munding gampil ngabid’ahkeun amalan batur, bisi batur anu ngalakukeun amal anu dianggap bid’ah ku urang… ternyata aya dasar dalil syar’i-na… aya haditsna… atawa pernah dilakukeun ku Rasulullah SAW…

Sabab lamun gampang ngabid’ahkeun amalan batur anu ternyata aya dasar dalil syar’i-na… Maka saur Rasulullah SAW:
مَنْ كَذَبَ عَلَيَّ مُتَعَمِّداً فَلْيَتَبَوَّأْ مَقْعَدَهُ مِنَ النَّارِ
”Sing saha anu ngahaja bohong nyalindung ngatas namakeun kuring… Saur Rasulullah SAW.. “ maka siapkeun tempat calikna tina seuneu naraka..”
Hadits ieu sanes berlaku kangge anu resep nyandarkeun ucapan atawa amalan ka Rasulullah SAW hungkul… Sanes ngan saukur berlaku kangge anu resep nyarios sembarangan atawa anu resep ngaya-ayakeun amalan anu saenyana teu aya ti Rasulullah SAW… tapi oge berlaku kangge anu resep nga-teu ayakeun amalan anu saenyana dilakukeun ku Rasulullah SAW…
Maka sing saha anu nganggap amalan sunah… Disebut lain sunah… Sabab teu dilakukeun ku kelompokna… Atawa teu dilakukeun ku alirana… Maka sami فَلْيَتَبَوَّأْ مَقْعَدَهُ مِنَ النَّارِ. bakal disiapkeun tempat calikna tina seuneu naraka…
Jadi ulah gampil ngabid’ah-bid’ahkeun amalan batur, nganggap sesat amalan batur, komodeui langsung divonis bakal asup naraka… Sabab Naraka teh sanes milik aki buyut urang.. Maka Insya Allah dina pembahasan Shalat di masjid Ad-Da’wah ieu… Urang buka ku wawasan pendapat Imam Madzhab anu opat sareng pendapat ulama-ulama sanesna anu diakui ku Ahlus Sunnah wal Jama’ah…
Tujuana sanes hoyong ngalilieur… Tapi justru supaya urang saling toleransi kana perbedaan… ulah gara-gara masalah qunut teu qunut, masalah do’a iftitah aya anu Allahuakbar Kabiira aya anu Allahumma Baa’id Baini… Urang nepika silih salahkeun… Anu qamat sakali-sakali jeung anu dua kali-dua kali nepika silih salahkeun… Padahal duanana aya haditsna… Lamun jaman kiwari urang masih keneh kitu… Karunya engke bisi diseungseurikeun ku bangkong anu tara ka masjid… Ari bangkong osok ka masjid Pak? Berarti anu tara ka masjid sarua jeung…
Insya Allah dina pembahasan Fiqh anu bade dihanca mulai wengi ieu… Pribados bade ngarujuk kana sababaraha Kitab, lamun masak mah aya uyahna, aya gulana, aya aya bawangna, aya muncangna… Engkin dimukhtasharkeun atawa diringkaskeun, disederhanakeun jantena kertas, anu dicandak ku pribados ieu… Insya Allah upami tos seueur bade dijilid atawa dibukukeun…
Diantarana kitab anu dicandak, Mukhtashar Shahih Bukhari, Mukhtashar Shahih Muslim, Riyadhus Shalihin Imam Nawawi, Bidayatul Mujtahin wa Nihayatul Muqtashid Ibnu Rusydi anu janten Kitab Rujukan Perbandingan Madzhab Ahlus Sunnah wal Jama’ah, kitab Bulughul Maram Al-Hafidz Ibnu Hajar Al-Asqalani, kitab Ihya ‘Ulumuddin Imam Al-Ghazali sareng kita-kitab sanesna anu ngarujuk kana Ahlus Sunnah wal Jama’ah… Utamina Madzahibul ‘Arba’ah Imam Madzhab anu opat… Maliki, Hanafi, Syafi’i sareng Hanbali… Mung moal sadayana pendapat bade didugikeun… Bilih engkina lieur…
Sakali deui tujuana mudah-mudahan jama’ah masjid Ad-Da’wah… Tiasa sami-sami langkung toleran kana perbedaan… sareng sili ngahargaan kana kayakinan batur salami aya dasar dalil syar’i-na… Bade tina Quran, Hadits, Ijma atanapi Qiyas… Janten teu aya anu silih salahkeun gara-gara beda cara wudhu atawa beda bacaan shalatna…
Komodeui lamun dugika mikaijid amalan batur jeung nganggap bid’ah amalan batur… Ngan saukur kusabab teu dilakukeun ku kelompokna atawa alirana… Padahal… Man ragiba ‘an Sunnati falaisa minnii… saur Rasulullah SAW… Sing saha anu ijid kana sunah kuring, maka moal asup kana golongan kuring…

Hadits ieu sanes jang urusan Nikah hungkul… Margi sunah anu diajarkeun ku Rasulullah SAW teh saes nikah hungkul…. Seueur sunah-sunah anu diajarkeun ku Rasulullah SAW… Malah urang mah jigana langkung seueur anu teu apalna tibatan anu apalna kana sunah-sunah Rasulullah SAW… Jadi lamun teu apal aya atawa henteu haditsna… Ulah gagabah saalit-saalit nyarios “Ieu teu aya sunahna ti Rasulullah…” “Ieu Bid,ah..” “ieu lebet naraka…” sabab anu model kitu sami saur Rasulullah SAW فَلْيَتَبَوَّأْ مَقْعَدَهُ مِنَ النَّارِ bakal disiapkeun tempat calikna tina seuneu naraka…
Para Bapak Rahimakumullah…
Shalat teh saenyana tos melekat jeung urang ti saacan urang lahir ka alam dunia… Dugika engkin urang maot… Sateu acan lahir ka alam dunia… Ibu urang Shalat nalika urang masih keneh aya dina kandungan, anu hartosna urang tos dicacandak shalat nalika masih aya keneh dina alam rahim…
Lahir ka alam dunia ieu, urang diajar shalat kunu janten sepuh, kunu janten guru… Saatos baligh urang janten Mukallaf… Dipaparin taklif kawajiban shalat ku Allah sareng Rasul-Na… Nalika maot oge… Urang masih keneh dishalatkeun ku dulur-dulur urang, ku tatangga urang saacan lebet ka alam barzah… Jadi shalat teh moal leupas ti saacan lahir dugika maot urang… Kumargi kitu meumpeung urang hirup keneh… Hayu urang sami-sami ngajaga shalat urang… meumpeung acan dishalatkeun ku batur… Hayu urang hideng shalat nyalira ka masjid…
Para Bapak Rahimakumullah…
Sateu acan lebet kana pembahasan shalat.. Wayahna kedah dibahas heula kakait wudhu… Sabab “Moal ditarima salat urang sadayana lamun urang teu acan wudhu heula…
لاَ تُقْبَلُ صَلاَةُ أَحَدِكُمْ إِذَا أَحْدَثَ حَتَّى يَتَوَضَّأَ
“Moal ditarima Shalat maneh kabeh –lamun masih hadast- nepika wudhu heula.“ [Muttafaqun ‘alaihi]

Oge dina hadits sanesna anu diriwayatkeun ku Imam Bukrari, Muslim, Abu Daud, At-Tarmidzi:

لَايَقْبَلُ اللهَ صَلَاةَ مَنْ أَحْدَثَ حَتَّى يَتَوَضَّأَ
“Allah moal narima shalat jalmi anu hadas, nepika manehna wudhu.”

Janten… Sadayana ulama madzhab anu opat sepakat teu aya perbedaan, teu aya perselihan… sateuacan shalat wajib kedah wudhu heula… Timbul pertanyaan… Wudhu anu kumaha? Nyaeta wudhu anu sampurna… Sabab sampurna na wudhu mangrupakeun salah sahiji sabab anu tiasa ngajadikeun shalat urang sampurna… Lamun urang wudhuna tos sampurna, maka shalat fardhu urang bakal janten kifarat kana dosa-dosa alit urang diantara shalat fardhu anu nuju dilakukeun dugika shalat fardhu anu bade dongkap, keterangana aya dina hadits shahih Imam Muslim:
مَنْ تَمَّ الْوُضُوْءَ كَمَا أَمَرَهُ اللهُ تَعَالَى فَالصَّلَوَاتُ الْمَكْتُوْبَاتُ كَفَّارَاتٌ لِمَا بَيْنَهُنَّ

“Sing saha anu nyampurnakeun wudhunan sakumaha anu diparentahkeun Allah Ta’ala, maka shalat-shalat fardhu anu dilakukeuna bakal jadi kifarat kana dosa-dosa alit diantara waktu shalat fardhuna.”

Wudhu anu sampurna teh anu kumaha? Jawabana aya dina Shahih Bukhari sareng Shahih Muslim anu bade didugikeun ayeuna.. Hadits ieu dongkapna ti Ustman ibnu ‘Affan anu saur Ibnu Syihab Az-Zuhri… Ibnu Syihab Az-Zuhri nyaeta ulama ahli hadits di di zaman Khalifah Umar bin Abdul ‘Aziz, ulama anu ngawitan ngabukukeun ilmu hadits… Saur Imam Adz-Dzahabi, ku pinter-pinterna Ibnu Syihab Rahimahullah wanafa’ana bi ‘ulumihi tiasa ngahapal Al-Quran ngan saukur 8 dinten…

Saur Ibnu Syihab, ieu hadits anu nunjukeun wudhu paling sampurna sakumaha ditulis dina kitab Shahih Bukhari sareng Shahih Muslim:
وَكَانَ عُلَمَاؤُنَا يَقُوْلُوْنَ هَذَا الْوُضُوْءُأَسْبَغُ مَا يَتَوَضَّأَ بِهِ أَحَدٌ لِلصَّلَاةِ

“Ieu wudhu anu paling sampurna anu kudu dilakukeun ku saha wae nalika bade shalat.”
Para Bapak Rahimakumullah…
Sateu acan lebet kana hadist anu ngariwayatkeun wudhu, aya sababaraha amalan anu kedah dilakukeun sateuacan wudhu… Margi wudhu teh aya dua… Aya anu katingali gerakana… Aya oge anu teu katingali… Diantara Wudhu anu teu katingali gerakana nyaeta… Niat… Ulama beda pendapat dina masalah niat… Madzhab Syafi’i, Maliki, Ahmad, sareng Abu Daud ngalebetkeun niat kana syarat sah wudhu… Kusabab ayana hadits ti Amirul Mu’minin Umar bin Khattab anu nyebatkeun:
إَنَّمَاالْأَعَمَالُ بِالنَّيَاتِ
“Saenyana amal-amal dibarengan ku niat.” (HR Jama’ah)
Upami madzhab Hanafi mah…. Niat teh teu lebet kana syarat sah wudhu… Janten upami urang biasa niat nalika wudhu, berarti urang nyandak pendapat Imam Maliki, Syafi’i, Ahmad sareng Abu Daud… Saur Imam Al-Ghazali dina Ihya ‘Ulumuddin disebatkeun niat teh dilakukeun nalika awal wudhu sareng nuju ngumbah penteu… Dua kali… Bacaanna bade Nawaetu Raf’al Hadasil Ashgari Fardhal Lillahi Ta’ala mangga… bade ku bahasa sunda oge mangga…
Teras dina hadits anu diriwayatkeun Ibnu Majah sareng Abu Daud, sateuacan wudhu… urang oge dikedahkeun maca Bismillah… Margi saur Rasulullah SAW, moal sah wudhu urang lamun teu acan maca Bismillah:

لاَ صَلاَةَ لِمَنْ لاَ وُضُوْءَ لَهُ، وَلاَ وُضُوْءَ لِمَنْ لَمْ يَذْكُرِ اسْمَ اللهِ عَلَيْهِ
“Teu sah shalat lamun teu wudhu heula. Jeung teu sah wudhuna lamun teu ngucapkeun Bismillah.” Hadits Hasan: [aya dina Shahiih Sunan Ibni Majah (no. 320)], sareng Sunan Abi Dawud (‘Aunul Ma’buud) (I/174 no. 101), dan Sunan Ibni Majah (I/140 no. 399).

Dina Kitab Ihya ‘Ulumuddin disebatkeun saatos maca Bismillah… urang ngado’a heula:

أَعُوْذُبِكَ مِنْ هَمَزَاتِ الشَّيَاطِيْنِ وَأَعُوْذُبِكَ رَبِّ أَنْ يَحْضُرُوْنَ
“Abdi nyalindung ka Gusti tina godaan syetan, sareng abdi nyalindung ka Gusti supaya syetan-syetan teu ngadongkapan abdi.”
Malah dina kitab Bulughul Maram Ibnu Hajar Al-Asqalani mah… Disebatkeun hiji Hadits anu nganjurkeun siwakan heula sateu acan wudhu, haditsna ti Abu Hurairah anu diriwiayatkeun ku Imam Malik, Ahmad sareng An-Nasa’i:
لَوْلَا أَنْ أشُقَّ عَلَى أُمَّتِيْ لَأَمَرْتُهُمْ بِالسِّوَاكِ مَعَ كُلِّ وُضُوْءٍ
“Lamun teu ngabeuratkeun ka umat kuring, maka kuring bakal marentahkeun siwakan tiap bade wudhu.”
Janten aya sababaraha amalan sateuacan wudhu, diantarana maca Bismillah anu diwajibkeun sateuacan wudhu, teras siwakan anu disunahkeun ku Rasulullah SAW… Nembe lebet kana wudhu… Dina hadits anu diriwayatkeun ti Utsman ibnu ‘Affan… haditsna aya dina Shahih Imam Bukhari sareng Shahih Imam Muslim… Oge aya dina Sunan Abu Daud sareng Sunan An-Nasa’i, hadits ieu disebat ku Ibnu Syihab Az-Zuhri, mangrupakeun riwayat anu ngajelaskeun wudhu anu sampurna, nyaeta:
Kahiji,
أَنَّ عُثْمَانَ دَعَا بِوَضُوْءٍ فَتَوَضَّأَ: فَغَسَلَ كَفَّيْهِ ثَلاَثَ مَرَّاتٍ،
“Saenyana Utsman bin ‘Affan Radhiyallahu ‘anhu nyungkeun cai kangge wudhu. Anjeuna ngumbah dua tapak panangana tilu kali…”
Dina ngumbah panangan ieu madzhad Maliki sareng Syafi’i sepakat ngumbah panangan nalika wudhu kalebetna sunnah… Bacaan do’ana saur Imam Al-Ghazali dina kitab Ihya ‘Ulumuddin nyaeta:
أَللّهُمَّ إِنِّى أَسْأَلُكَ الْيُمْنَ وَالْبَرَكَةَ وَأَعُوْذُبِكَ مِنَ الشُّؤمِ وَالْهَلَكَةِ
“Ya Allah saenya abdi nyungkeun ka Gusti kauntungan sareng kaberkahan, sareng abdi nyalindung ka Gusti tina kaapesan sareng kabinasaan.”
Kadua,
ثُمَّ مَضْمَضَ وَاسْتَنْثَرَ،
“Teras kekemu sareng nyedot cai kana pangamung teras dikaluarkeun deui.”
Dina masalah kekemu atawa madhmadhah… Sareng nyedot cai ku pangambung atawa instinsyaq sareng ngaluarkeun cai ti pangambung atawa istintsar… Imam Syafi’i, Maliki, sareng Hanafi sepakat hukumna sunnah… Imam Ahmad nyebatkeun hukumna wajib kangge anu dewas, sunnah kangge murangkalih… Kekemuna tilu kali, istinsyaq, sareng istintsar oge tilu kali…
Do’a nuju madhmadhah atawa nuju kekemu saur Imam Al-Ghazali nyaeta:
أَللّهُمَّ أَعِنِّي عَلَى قَرَارَةِ كِتَابِكَ وَكَثْرَةِ الذِّكْرِلَكَ
“Ya Allah tulungan abdi kana katetapan Kitab Gusti sareng seueur dzikir ka Gusti.”
Teras doa’ nuju instinsyaq… Atawa nuju nyedot cai ka pangambung do’ana:
أَللّهُمَّ أَوْجِدْلِي رَائِحَةَ الْجَنِّة وَأَنْتَ عَنِّي رَاضٍّ
“Ya Allah raoskeun ka abdi seungitna Surga sareng Gusti ridha ka abdi.”
Upami nuju ngaluarkeun cai tina pangambung atawa istintsar, saur Imam Al-Ghazali do’ana:
أَللّهُمَّ إِنِّي أَعُوْذُبِكَ مِنْ رَوَائِحِ النَّارِ وَمِنْ سُوْءِالدَّارِ
“Ya Allah saenyana abdi nyalindung ka Gusti tina babauan Naraka sareng nyalindung ka Gusti tina tempat uih anu awon.”

Katilu,
ثُمَّ غَسَلَ وَجْهَهُ ثَلاَثَ مَرَّاتٍ،
“Teras ngumbah penteuna tilu kali”
Para ulama sepakat ngumbah penteu ngarupakeun salah sahiji fadhu wudhu.. Janten wajib dilakukeun nalika wudhu… Ngan ulama beda pendapat dina batasan penteu anu kudu dikumbah… Pendapat Imam Maliki mah penteu atawa wajah teh ngan dugika cambang, kulit antara cambang jeung cepil teu kalebet penteu atawa wajah…
Imam Syafi’i sareng Imam Abu Hanifah mah nyebatkeun eta oge kalebet kana wajah… Ieu sami pendapatna sareng Imam Al-Ghazali nyaeta wajah teh ti luhur ti mimiti luhureun tarang anu teu aya rambutan, dugika gado… Lamun ti gigir antara cepil dugika cepil deui… Jadi diusap sadayana, dugika kumis, halis, bulu soca sareng cambang baseuh… teras ramo ditekenkeun kana ujung soca supaya cileuhna bersih…
Sareng dina masalah janggot aya dua pendapat… Imam Maliki mah ngawajibkeun diusap janggotna ku cai sing rata dugika ujungna… Upami Imam Syafii sareng Imam Abu Hanifah mah teu wajib ngusap cai kana janggotna… Tapi hukumna sunat…
Doa’na saur Imam Al-Ghazali nyaeta;
أَللّهُمَّ بَيِّضْ وَجْهِي بِنُوْرِكَ يَوْمَ تَبْيَضُّ وُجُوْهُ أَوْلِيَائِكَ وَلَاتُسَوِّدْ وَجْهِيْ بِظُلُمَاتِكَ يَوْمَ تَسْوَدُّوُجُوْهُ أَعْدَائِكَ
“Ya Allah bodaskeun penteu abdi ku cahaya Gusti dina dintenan para kakasih Gusti ngaluarkeun cahaya bodas dina penteuna, sareng ulah dihideungkeun peunteu abdi ku kapoekan Gusti dina dintenan hararideung penteu musuh-musuh Gusti.”
Kaopat,
ثُمَّ غَسَلَ يَدَهُ الْيُمْنَى إِلَى الْمِرْفَقِ ثَلاَثَ مَرَّاتٍ، ثُمَّ غَسَلَ يَدَهُ الْيُسْرَى مِثْلَ ذلِكَ،
“Teras ngumbah panangan katuhuna dugika siku tilu kali, kitu oge ngumbah panangan kencana jiga ngumbah panangan katuhu tadi.”
Para ulama sepakat ngumbah panangan dugika siku lebet kana fardhu wudhu, Imam Maliki, Imam Syafi’i, Imam Abu Hanifah sareng Imam Ahmad sepakat siku lebet kana panangan anu wajib dikumbah… Dikumbahna anu kanan heula, anu biasa ngangge cincin, cincina kedah digerak-gerak supaya cai lebet kana sela-sela ramona… do’a nuju ngumbah panangan katuhu nyaeta:
أَللّهُمَّ أَعْطِنِي كِتَابِي بِيَمِيْنِيْ وَحَاسِبْنِيْ حِسَابًا يَسِيْرًا
“Ya Allah paparin ka abdi kitab catatan amal abdi ti palih kenca abdi sareng hisab abdi ku hisaban anu gampil.”
Teras ngumbah panangan anu kenca dugika sikuna sami tilu kali sabari maca do’a:
أَللهُمَّ إِنِّي أَعُوْذُبِكَ أَنْ تُعْطِنِيْ كِتَابِي بِشِمَالِي أَوْمِنْ وَرَاءِظَهْرِيْ
“Ya Allah saenyana abdi nyalindung ka Gusti supaya Gusti teu maparin kitab catatan amal abdi ti palih kencaen abdi, oge teu maparin kitab catatan amal abdi ti pengkereun tonggong abdi.”
Kalima,
ثُمَّ مَسَحَ رَأْسَهُ،
“Teras ngusap mastakana,”
Para ulama sepakat ngusap mastaka teh lebet kana salah sahiji fardhu wudhu, ngan ulama beda pendapat dina batasan anu kedah diusapna… Madzhab Maliki gaduh pendapat diusapna teh sadayana… Madzhab Syafi’i, Hanafi sareng sapalih murid Imam Malik gaduh pendapat diusapna ngan sapalihna…Madzhab Syafi’i mah tea aya batasan dina ukurana, upami Madzhad Hanafi mah kedah saparapat tina mastaka anu diusapna, murid Imam Malik nyebatkeun sapertilu mastaka anu kedah diusapna…
Dina Kitab Ihya ‘Ulumuddin Imam Al-Ghazali dijelaskeun… Cara ngusap mastaka teh nyaeta dua panangan dibaseuhan, ditempelkeun tungtung ramo panangan kenca sareng tungtung ramo panangan katuhu, teras ditempelkeun dina mastaka anu payun… Diusapkeun ka arah punuk teras uih deui ka payun, seueurna tilu kali…
Jadi sanes sirah diguyur ku cai… Nepika jibrug… Tapi مَسَحَ رَأْسَهُ diusap mastakana, sanes رَأْسَهُ غَسَلَ ngumbah mastakana… Sanes oge ngusap rambut… Tapi ngusap mastaka… do’ana saur Imam Al-Ghazali:
أَللّهُمَّ أَغِثْنِي بِرَحْمَتِكَ وَأَنْزِلْ عَلَيَّ مِنْ بَرَكَتِكَ وَأَظِلْنِيْ تَحْتَ عَرْشِكَ يَوْمَ لَاظِلَّ إِلَّاظِلُّكَ
“Ya Allah, tulungan abdi ku rahmat Gusti, sareng turunkeun ka abdi kabarokahan Gusti, sareng tangtayungan abdi dihandapeun tangtayungan ‘Arsy Gusti dina dintenan teu aya tangtayungan iwal ti tangtayungan Gusti.”
Teras dina ngusap cepil aya perbedaan pendapat, aya anu nyebatkeun ngusap cepil teh lebet kana fardhu wudhu, margi cepil lebet kana bagian tina mastaka, anu nyebatkeun ngusap cepil fardhu… diantarana madzhab Maliki sareng madzhab Hanafi… Ngusapna disarengkeun sareng ngusap mastaka…
Upami Madzhad Syafi’i mah ngusap cepil teh sunat, dipisahkeun sareng ngusap mastaka… Janten madzhad Syafi’i mah ngusap mastaka heula, nembe ngusap cepil ku cai anu enggal..
Dua pendapat ieu aya haditsna… Pendapat anu kahiji, anu ngahijikeun ngusap mastaka sareng cepil ku sakali usapan nyandakna tina haditsna ‘Abdullah ibnu ‘Amr anu diriwayatkeun ku Imam Abu Daud saren Imam An-Nasa’i anu dishahihkeun ku Ibnu Khuzaimah, nyaeta:
عَنْ عَبْدِاللهِ بْنِ عَمْرٍرَضِيَ اللهُ عَنْهُمَافِي صِفَةِ الْوُضُوْءِ قَالَ: ثُمَّ مَسَحَ صَلَّى اللهُ وَسَلَّمَ بِرَأْسِهِ وَأَدْخَلَ إِصْبَعَيْهِ السَّبَاخَتَيْنِ فِي أُذُنَيْهِ وَمَسَحَ بِإِبْهَامَيْهِ ظَاهِرَ أُذُنَيْهِ
“Ti Abdullah bin ‘Amr Radhiyallhu ‘Anhuma ngajelaskeun tata cara wudhu Nabi SAW, saurna: Teras Nabi SAW ngusap mastakana sareng ngalebetkeun dua ramo curukna kalebet liang cepilna, teras ngusapkeun dua jempolna kana luar daun cepilna.”
Sementara pendapat anu dipisah antara ngusap mastaka sareng ngusap cepil nyandakna tina hadits Abdullah bin Zaid anu diriwayatkeun ku Imam Muslim sareng Imam Baihaqi:
وَعَنْهُ أَنَّهُ رَأَى النَّبِيَّ صَلَّى اللهُ عَلَيْهِ وَسَلَّمَ يَأْخُذُ لِأُذُنَيْهِ مَاءً غَيْرَ الْمَاءِ الَّذِيْ أَخَذَهُ لِرَأسِهِ (أَخْرَجَهُ الْبَيْهَقِيُّ وَهُوُ عِنْدَ مُسْلِمٍ مِنْ هذَا الْوَجْهِ بِلَفْظٍ:وَمَسَحَ بِرَأسِهِ بِمَاءٍ غَيْرِفَضْلِ يَدَيْهِ وَهُوَالْمَحْفُوْظُ)
“Ti Abdullah bin Zaib kantos ningali: “Nabi SAW nyandak cai kangge ngusap dua cepilna salain cai anu digunakeun ku kanjeung Nabi kangge ngusap mastakana.” (HR. Al-Baihaqi) Hadits ieu oge diriwayatkeun ku Imam Muslim tina jalur sanad anu sami lafadzna: “Jeung Nabi SAW ngusap mastakana ku cai sanes tilas cai ngumbah panangana.”
Dua hadits ieu didugikeun supaya urang teu aneh… atawa ngabid’ahkeun amalan batur… Upami mendakan anu wudhuna benten jeung urang… Aya anu ngusap mastakan sakaligus jeung cepil, aya oge anu sapertos urang misah antara ngusap mastaka sareng ngusap cepil… eta duanana aya dalilna…
Kumaha cara ngusap cepil teh? Dijelaskeun dina Ihya ‘Ulumuddin… Carana nyaeta lebetkeun curuk anu kenca kana liang cepil anu kenca, curuk anu katuhu kana liang cepil anu katuhu, teras jempolna diputerkeun dina daun cepil anu luar.. Teras nekenkeun tapak panangan kana cepil… Sadayana gerakan diulangi tilu kali.. do’ana:
أَللّهُمَّ اجْعَلْنِيْ مِنَ الَّذِيْنَ يَسْتَمِعُوْنَ الْقَوْلَ فَيَتَّبِعُوْنَ أَحْسَنَهُ أَللّهُمَّ أَسْمِعْنِيْ مُنَادِيَ الْجَنَّةَ مَعَ اْلأَبْرَارِ
“Ya Allah, jadikeun abdi kalebet jalmi-jalmi anu ngupingkeun cariosan teras ngiring anu pang saena. Ya Allah, kupingkeun ka abdi soanten anu ngageroan ka surga sasarengan sareng jalmi-jalmi anu midamel kasaean.”
Kagenep,
ثُمَّ غَسَلَ رِجْلَهُ الْيُمْنَى إِلَى الْكَعْبَيْنِ ثَلاَثَ مَرَّاتٍ، ثُمَّ غَسَلَ الْيُسْرَى مِثْلَ ذَلِكَ،
“Teras ngumbah sampeana anu kenca dugika mata kaki tilu kali, kitu oge sampean katuhuna tilu kali.”
Dina ngumbah sampean Imam madzhab anu opat oge sepakat lebet kana fardhu wudhu anu wajib dilakukeun, dina tata carana saur Imam Al-Ghazali nyaeta dikumbah sareng sela-sela ramo sampean ku jari manis panangan kiri… Dimimitian tina cingir sampean kanan, dugika cingir sampean kiri… Berarti lamun sampean kanan mah ti cingir heula, sampean kiri ti jempol heula…
Dikumbah dugika keuneung sareng mumuncangan-na… Sabab lamun teu dikumbah dugika keuneungna… Rasulullah SAW dugika ngajorowok ka para sahabat sabab teu ngumbah keuneungna dina wudhu… Sakumaha dina hadits ti Abdullah ibnu ‘Amr:
عَنْ عَبْدِ اللهِ بْنِ عَمْرٍو قَالَ : تَخَلَّفَ عَنَّا رَسُوْلُ اللهِ فِيْ سَفَرٍ سَفَرْنَاهُ، فَأَدْرَكَنَا وَقَدْ أَرْهَقَتْنَا الصَّلاَةُ، صَلاَةُ الْعَصْرِ وَنَحْنُ نَتَوَضَّأُ، فَجَعَلْنَا نَمْسَحُ عَلَى أَرْجُلِنَا، فَنَادَاناَ بِأَعْلَى صَوْتِهِ :” وَيْلُ لِلأَعْقَابِ مِنَ النَّارِ”

Ti Abdullah bin Amr nyarios: “Rasulullah SAW dina hiji safar kapayunan ku kami, teras Rasulullah nyusul mendakan kami- Nalika harita tos dongkap waktu shalat asar- Kami harita nuju wudlu, kami ngan saukur ngusap sampean. Teras Rasulullah SAW ngajorowok ka kami ku sora anu tarik: “Cilaka keuneung- keuneung anu teu keuna cai wudlu tina seuneu naraka” (Hadits shohih riwayat Bukhori dan Muslim)
Nalika ngumbah sampean anu katuhu do’ana saur Imam Al-Ghazali nyaeta:
أَللّهُمَّ ثَبِّتْ قَدَمِيْ عَلَى الصَّرَاطِ يَوْمَ تَزِلُّ الْأَقْدَامُ فَى النَّارِ
“Ya Allah pageuhkeun dampal sampean abdi di luhureun shirat nalika seueur dampal sampean anu tisoledat kana naraka.”
Upami do’a nuju ngumbah sampean anu kence nyaeta:
أَللّهُمَّ إِنِّي أَعُوْذُبِكَ أَنْ يَزِلُّ قَدَمِيْ عَنِ الصِّرَاطِ يَوْمَ تَزِلُّ أَقْدَامُ الْمُنَافِقِيْنَ
“Ya Allah, saenyana abdi nyalindung ka Gusti supados dampal sampean abdi teu tisoledat di luhureun shirath nalika tisoledatna dampal sampean jalmi-jalmi anu munafik.”
Teras dina panutup ieu hadits, Sayidina Utsman nyarios:
رَأَيْتُ رَسُوْلَ اللهِ صَلَّى اللهُ عَلَيْهِ وَسَلَّمَ تَوَضَّأَ نَحْوَ وُضُوْئِ هذَا ثُمَّ قَالَ رَسُوْلُ اللهِ صَلَّى اللهُ عَلَيْهِ وَسَلَّمَ : مَنْ تَوَضَّأَ نَحْوَ وُضُوْئِ هَذَا ثُمَّ قَامَ فَرَكَعَ رَكْعَتَيْنِ لاَ يُحَدِّثُ فِيْهِمَا نَفْسَهُ غُفِرَ لَهُ مَا تَقَدَّمَ مِنْ ذَنْبِهِ
“Kuring pernah ningali Rasulullah SAW wudhu sakumaha wudhu kuring ieu, teras Rasulullah ngandika, “Sing saha anu wudhu jiga wudhu kuring ieu, terus shalat dua raka’at jeung khusu’ teu ngalantur dina hatena kana urusan dunia salami shalatna, maka bakal dihampura dosa-dosana anu kalangkung.’”