Perbedaan Antara Tahaddus Bin Ni’mat Dengan Takabbur Bin Ni’mat
Perbedaan Antara
Tahaddus Bin Ni’mat Dengan Takabbur Bin Ni’mat
alfaqir: Yudha H. Bhaskara, SHI
السلام عليكم ورحمة الله وبركاته
اَلْحَمْدُللهِ الّذِىْ خَلَقَ اْلخَلْقَ عَلَى اْلإِطْلَاقِ. فَاطِرِ السَّمَوَاتِ وَاْلاْرْضِ وَبَاسِطِ الاْرْزَاقِ. أَشْهَدُأنْ لَااِلَهَ اِلّااللهُ وَحْدَهُ لَاشَرِيْكَ لَهُ اْلمَلِكُ اْلخَلّاق. وَأَشْهَدُأنَّ سَيّدَنَامُحَمّدًاعَبْدُهُ وَرَسُوْلهُ اْلمَبْعُوْثُ لِتَتْمِيْمِ مَكَارِمَ اْلاْخْلاق. اَلّلهُمَّ صَلِّ وَسَلّمْ وَبَارِكْ عَلَى سَيّدِنَا مُحَمّدٍ اْلفَاتِح لِمَاأُغْلِقَ وَالْخَاتِمِ لِمَا سَبَقَ وَالنَّاصِرِالْحَقَّ بِالْحَقِّ وَالْهَادِى اِلَى صِرَاتِكَ الْمُسْتَقِيْمِ وَعَلىَ أَلِهِ وَأَصْحَابِهِ حَقَّ قَدْرِهِ وَمِقْدَارِهِ الْعَظِيْمِ
، أَمَّابَعْدُ
…رَبِّ اصْرَحْلِى صَدْرِى وَيَسِّرْلِى أَمْرِى وَاحْلُلْ عُقْدَةً مِنْ لِسَانِ يَفْقَهُوْا قَوْلِى
سُبْحَانَكَ لَاعِلْمَ لَناَ اِلَّامَاعَلَّمْتَنَا اِنَّكَ اَنْتَ الْعَلِيْمُ الْحَكِيْمِ
Para Ibu anu dirahmati Allah SWT…
Alhamdulillah Kalayan rahmat sinareng nikmat ti Allah SWT.. Alhamdulillah sonten ieu urang tiasa ngalaksanakeun deui kawajiban tholab ilmu.. anu mudah-mudahan tiasa makin ningkatkeun kataqwaan urang ka Allah SWT.. Sareng tiasa nambihan amalan ibadah dina sadidinten urang sadayana…. Amin… Mudah-mudahan papahna para ibu sadayana ka ieu bumi kangge thalab ilmu.. anu caketna anu tebihna sing dijantenkeun pahala ku Allah SWT… Amin Ya Rabbal’alamin…
Dina ajaran Islam aya dua amalan anu Serupa tapi tak Sama… Sakilas… katingalina sami tapi saleresna benten.. Nyaeta Tahaddus Bin Ni’mat anu diperintahkeun ku Syari’at, sareng Takabbur Bin Ni’mat anu dilarang ku Syari’at… Insya Allah dina Pangaosan sonten ieu… Urang bahas saalit kakait: “Tahaddus Bin Ni’mat sareng Takabbur Bin Ni’mat..”
Ieu peryogi dibahas margi di sakurilingeun urang… sering mendakan jalmi anu sering ngabukakeun kasusahna… nyarios kaditu kadieu, tapi nalika dipasihan rezeki ku Allah, dipasihan nikmat ku Allah… jempe teu seueur carios ka sasaha… Urang husnudzan… Mudah-mudahan jalmi anu resep jempe nalika dipaparin nikmat ku Allah teh… kumargi sieun disebat riya atanapi sombong ku batur… Namung ulap hilap oge… parentah nyarioskeun nikmat Allah teh aya dina Al-Quran… nyaeta dina Surat Adh-Dhuha ayat 11:
وَأَمَّا بِنِعْمَةِ رَبِّكَ فَحَدِّثْ
“Jeung kana nikmat ti Pangeran anjeun, maka sakuduna anjeun nyebutkeu” (QS. Adh-Dhuha: 11).
Berarti nyumputkeun nikmat rezeki ti Allah teh bertentangan sareng ayat tadi… Anu puguh mah biasana… Nalika kengeng nikmat atanapi rezeki urang jempling teh biasana sanes sieun disebat riya… Biasana sieun kanyahoan ku batur ameh teu aya anu nyungkeun… Nuju teu gaduh mah dibuka sadayana kasusahna… ujung-ujungna malah makin nyaketkeun urang kana kuufur nikmat ka Allah… sing saha anu kufur kana nikmat Allah…
وَإِذْ تَأَذَّنَ رَبُّكُمْ لَئِنْ شَكَرْتُمْ لَأَزِيدَنَّكُمْ ۖ وَلَئِنْ كَفَرْتُمْ إِنَّ عَذَابِي لَشَدِيدٌ
“Jeung inget nalika Pangeran anjuen nguningakeun,”Saenyana lamun anjeun syukur, pasti bakal ditambahan nikmat ka anjeun, jeung lamun anjeun kufur atawa ingkar kana nikmat Kami, maka saenyana ‘azab kami beurat pisan.” (QS. Ibrahim ayat 7)
Janten Tahaddus Bin Ni’mat teh diajarkeun ku agama… tujuana naon? Supaya urang tiasa diajar nuhun ka Allah anu tos maparin sagala nikmat anu aya di urang ayeuna… Ngan nyaeta… urang mah biasana tibalik… Giliran kasusah diumbar kamamana… ari giliran kengeng nikmat sareng rezeki jempe teu beja-beja kamamana, Jigana teh Allah teu acan pernah masihan nikmat sareng rezeki ka urang saumur-umur… Padahal ieu sami artina urang Dzalim ka Allah… Urang kufur kana nikmat Allah upami terus-terusan nyarioskeun kasusah dina hirup urang… ieu peryogina diajar Tahaddus Bin Ni’mat….
Ngan kade oge, Tahaddus Bin Ni’mat teh aya carana… Urang kedah terang heula kumaha carana Tahaddus Bin Ni’mat supados teu justru tijeblos kana Takabbur Bin Ni’mat… anu akibatna bahaya kana amal ibadah urang… Upami tisoledat kana Takabbur Bin Ni’mat.. maka amal ibadah urang bakal rusak.. Sakumaha rusakna daun dilalab ku hileud.. atanapi kai dibeuleum ku seune…
Para Ibu Rahimakumullah…
Tahadduts bin ni’mah teh… nyaeta nyebatkeun nikmat anu tos dipaparin ku Allah, kalayan maksud hoyong nga-agungkeun sifat-sifatna Allah SWT.. Nyaksikeun ka diri urang sareng batur anu ngupingkeuna… yen… teu aya Dzat sanes iwal ti Allah hiji-hijina anu maparin sagala nikmat sareng rezeki anu aya di urang…, tujuana supaya timbul kayakinan dina manah urang sareng anu ngupingkeuna.. kana sifat Rahman sareng Rahim-Na Allah… Supados makin getol ibadah ka Allah-na… singkatna Tahadduts bin ni’mah teh ngarupakeun i’tiraf atanapi pengakuan urang kana sagala nikmat anu dongkapna ti Allah SWT..
Saleresna Tahaddus Bin Ni’mat tos disinggung nuju di pangaosan dinten Rebo di Masjid kamari… Kakait Sukur tea… Sukur teh ngaku dina manah eta rezeki paparin Allah, ngucapkeun dina lisan eta rezeki dongkapna ti Allah, ngagunakeun eta rezeki kana jalan anu diridhai Allah.. Tah ngucapkeun rasa syukur dina Lisan eta namina Tahadduts bin ni’mah… bentukna I’tiraf… Teu isin ngaku ka jalmi yen sagala nikmat sareng rezeki anu dipimilik ku urang ayeuna paparin Allah SWT…
Ibaratna kieu Bu… Nuju Alit para ibu osok dipangmeserkeun acuk ku sepuhna, ameung sareng rerencangan teras nyarioskeun eta acuk teh dipangmeserkeun ku sepuh… sanes kengeng meser nyalira… ieu ngabohong atawa henteu? Upami nyebatkeun eta acuk meser nyalira padahal masih alit keneh… teu acan tiasa meser acuk komo milarian acis, teras ngaku-ngaku eta acuk meser nyalira… Maka ieu murangkalih aya masalah dina mentalna… Ngabohong ngaku-ngaku kana naon anu teu dilakukeun ku anjeuna…
Takabbur Bin Ni’mat mah sabalikna… Saur Ibnul Qoyyim.. Takabbur Bin Ni’mat teh nyaeta ngaraos bangga kengeng nikmat ti Allah, tapi niatna sombong hoyong dipuji ku batur, hoyong katingali kengeng nikmat anu langkung tibatan batur.., tujuana supaya dianggap langkung mulia atanapi langkung beunghar tibatan batur…, niatna sanes hoyong kengeng ridha ti Allah, tapi ngan saukur hoyong dipika hormat, sareng hoyong diagung-agungkeun ku jalmi… (Kitab Ar-Ruh, Ibnul Qoyyim, hal. 312).
Serupa tapi tak sama… Sami nyebatkeun nikmat Allah-na mah, tapi niatna benten… Upami Tahadduts bin ni’mah niatna hoyong ngamuliakeun nikmat ti Allah, supaya tiasa janten wasilah ka batur, supaya tiasa nurutan kana amal ibadah urang, atanapi supaya makin yakin kana Maha Pemurah-na Allah SWT… sakumaha diparintahkeun dina Surat Ad-Dhuha ayat 11 tadi:
وَأَمَّا بِنِعْمَةِ رَبِّكَ فَحَدِّثْ
“Jeung kana nikmat ti Pangeran anjeun, maka sakuduna anjeun nyebutkeu” (QS. Adh-Dhuha: 11).
Takabbur Bin Ni’mat mah benten niatna… Niatna nyaeta hoyong ngamuliakeun diri nyalira.. kujalan ngagembar-gemborkeun nikmat ti Allah supaya dipuji ku batur… Ieu bahaya, margi tiasa ngarusak kana amal ibadah urang… Sakumaha rusakna daun dihama-an ku hileud.. jeung rusakna kayu dibeuleum ku seune..
Para Ibu Rahimakumullah…
Ngaraos teu Ngaraos .. Tiap dinten urang sadayana pasti dipaparin nikmat ku Gusti Allah.. Nikmat ti Allah teh bentukna seueur… Sanes ngan saukur nikmat gaduh acis… Allah maparin nikmat sareng rezeki-Na ka urang teh bentukna benten-benten… Kadang Allah maparin nikmat ka urang… rezeki anu bentukna Lahiriyah, atawa nikmat anu katingali ku batur.. sapertos gaduh bumi, gaduh mobil sareng sajabina…
Kadang oge Allah maparin nikmat ka urang rezeki anu bentukna Bathiniyah.. ngan urang hungkul anu ngaraoskeuna… misalna rasa tenang saatos ngalakukeun Amal Shaleh… Saatos ngiring Pangaosan bakal muncul rasa tenang dina manah… eta teh nikmat ti Allah… Rasa tenang dina manah, bakal muncul saatos ngiring Pangaosan… Sakumaha janji Rasulullah SAW anu tos didugikeun dina pangaosan para Ibu di masjid kamari…
وَمَا اجْتَمَعَ قَوْمٌ فِي بَيْتٍ مِنْ بُيُوتِ اللَّهِ يَتْلُونَ كِتَابَ اللَّهِ وَيَتَدَارَسُونَهُ بَيْنَهُمْ إِلَّا نَزَلَتْ عَلَيْهِمُ السَّكِينَةُ وَغَشِيَتْهُمُ الرَّحْمَةُ وَحَفَّتْهُمُ الْمَلَائِكَةُ وَذَكَرَهُمُ اللَّهُ فِيمَنْ عِنْدَهُ
”Jeung moal samata-mata kumpulna hiji riungan jalmi di bumi anu kalebet bumi-bumi Allah (Sapertos Masjid, Majelis Ta’lim atanapi Bumi anu dijantenkeun Majelis Ta’lim), dieusian ku maraca Al-Quran sareng sili ngajarkeun diantara manehna, iwal ketenangan bakal diturunkeun ka para jalmi anu aya di lebetna, rahmat Allah nyimutan manehna, sareng malaikat ngurilingan ka sadaya jalmi anu aya di eta tempat, bari bakal disebut-sebut ku Allah dipayuneun (para malaikat) anu aya di sakuriling Allah.” [HR Muslim, 2699].
Janten nikmat ti Allah teh aya anu bentukna Lahiriyah aya oge anu bentukna Bathiniyah… oge aya anu bentukna nikmat Diiniyyah.. Sapertos dipaparin kakiatan tiasa angkat ngiring Pangaosan jiga ayeuna… Teu sadayana para Ibu dipaparin nikmat tiasa dongkap ka Pangaosan… Oge aya nikmat anu bentukna Dunyawiyah.. ngan manfaat saukur di dunia hungkul… Tah kawajiban urang salaku hamba-Na Allah SWT nalika dipasihan nikmat sareng rezeki ku Allah nyaeta bersyukur.. Salah sahiji carana tadi kujalan Tahaddus binni’mah…
Kantos teu para ibu nyarios ka tatanggi kieu? “Alhamdulillah abdi masih keneh dipaparin badan anu sehat ku Allah… dugika ayeuna masih keneh tiasa damel…” Alhamdulillah upami aya keneh anu osok nyarios kitu… Margi eta teh salah sahiji cara anu nuju dibahas ayeuna… Nyaeta Tahaddus binni’mah… Ngan nyaeta ayeuna mah seseringna… urang osok hilap nganuhunkeun ka Allah… nalika aya dina kondisi badan anu sehat, urang hilap ka Allah… Tapi nalika titajong cingir sampean urang nyeri… Padahal nyerina teu sapira… didongengkeun kamamana….
Padahal Allah tos maparin nikmat ka urang anu teu kaetang… Waing Ta’uddu ni’matallahi laa tuhsuuha… Lamun anjeun bade ngitung kana nikmat Allah.. moal tiasa ngitung dugika iraha oge… Tadi dicontohkeun Alhamdulillah urang dipasihan nikmat badan anu sehat… Nikmat anu aya dina badan urang hungkul ieu para Ibu.. moal tiasa kaetang sabaraha nikmat anu tos dipaparin Allah ka urang sadayana…
Ngan nyaeta… urang mah biasana teu ngaraos kengeng nikmat upami badan urang hungkul anu sehat… Tapi kantong urang kering atawa teu gaduh acis… Tara disebatkeun nikmat badan sehat mah…. Anu mineung disebatkeun mah biasana lamun nuju lebet angin… “Duh nuju nyeri patuangan lebet angin nyaeta…” atanapi muriang “ Nyaeta awak teh tos reyod ngan muriangan wae…”… Padahal saleresna nikmat sehat teh langkung awis tibatan nikmat jalmi anu gaduh acis…
Urang cobian buktikeun nikmat sehat teh awis… Ayeuna Alhamdulillah.. Urang sadayana dipaparin dua ginjal anu sehat ku Allah SWT… Katingalina sapira, padahal upami ginjal urang teu sehat atanapi reksak… urang kedah kaluar acis seueur kangge cuci darah…. Atanapi urang kedah meser ginjal… Padahal hiji ginjal hungkul Bu… ayeuna di pasar gelap hargina tos mencapai 2 miliar.. Tapi ku Allah mah… urang dipasihan dua ginjal, gratis nempel dina Badan urang… hartosna aya 4 Miliar nempel dina badan urang… Kantos teu Allah ngirim tagihan ka Bumi nyungkuen dua ginjal anu aya dina badan urang ieu dibayar??? Teu pernah Bu nya…. Allah mah ngan ngawajibkeun hiji hungkul ka urang salaku hambana… Nyaeta ibadah hungkul… Bari masih keneh diburuhan ku Surga engkin di Akhirat lamun urang Ibadah ka Allah… Teu Rahman sareng Rahim kumaha Allah ka urang…
Makana engkin uih pangaosan ieu Para Ibu.. upami angkat-angkatan tebih… Omat ulah nyalira.. sabab bahaya nyanyandak acis 4 miliar dina badan para Ibu… Tapi kade oge Bu… Gara-gara nguping pangaosan ieu.. muncul ide hoyong ngical ginjal.. Ulah.. Kahiji Dosa… Kadua bilih ditewak polisi.. margi aya pasalna kakait jual beli organ tubuh tiasa dipenjara…
Ngical ginjal teh haram margi sadayana anu aya di badan urang ieu milik Allah, urang sadayana teu berhak ngical anu sanes milik urang…, sah-na akad jual beli teh upami aya ijab sareng qabul antara anu “gaduh” sareng anu meserna…. Janten teu sah upami urang ngical barang anu sanes milik urang… Innaalillahi Wainnaa Ilaihi raajiu’n.. Urang sadayana milik Allah sareng bakal uih deui kanu gaduhna… berarti teu sah lamun naon anu aya di badan urang diperjual belikan… Sabab sanes milik urang….
Di Bandung kamari rame berita seueur jalmi anu ngical ginjal… berarti ieu ngalakukeun perbuatan anu haram, sabab ngical ginjal anu sanes milikna… Ieu pelajaran kangge urang… Urang buktikeun firman Allah dina surat Ibrahim ayat 7 Tadi…
وَإِذْ تَأَذَّنَ رَبُّكُمْ لَئِنْ شَكَرْتُمْ لَأَزِيدَنَّكُمْ ۖ وَلَئِنْ كَفَرْتُمْ إِنَّ عَذَابِي لَشَدِيدٌ
“Jeung inget nalika Pangeran anjuen nguningakeun,”Saenyana lamun anjeun syukur, pasti bakal ditambahan nikmat ka anjeun, jeung lamun anjeun kufur atawa ingkar kana nikmat Kami, maka saenyana ‘azab kami beurat pisan.” (QS. Ibrahim ayat 7)
Diantara anu ngical ginjal aya anu namina Jego (Nami Samaran)… Ngical ginjal sahargi 70 juta cenah… Ku Allah dibuktikeun, sabab ieu jalmi teu sukur kana nikmat anu tos dipaparin Allah… Eta acis hasil ngical ginjal ku anjeuna dianggo meser tipi sareng barang elektronik sanesna… Sesana rencana-na bade dianggo kangge meser bumi.. Mung teu acan kaanggo meser bumi enggal…
Ku Allah dibuktikeun… وَلَئِنْ كَفَرْتُمْ إِنَّ عَذَابِي لَشَدِيدٌ “jeung lamun anjeun kufur atawa ingkar kana nikmat Kami, maka saenyana ‘azab kami beurat pisan”…. Dongkap maling ka bumina… Acis hasil ngical ginjal eta dipaok ku maling sadayana… berikut barang-barang elektonik anu dipeser tina hasil ngical ginjal eta…
Si Jego ieu yuswana anom keneh masih 20 tahunan… tapi gara-gara ginjalna diical… ayeuna fisikna janten lemah, enggal capek, enggal eungap, enggal leuleus sabab ginjalna kantun hiji deui… Kahirupana sales janten langkung sae malah janten langkung susah… Ieu dibuktikeun ku Allah ka jalmi anu teu bersyukur… Ginjalna ical dicandak batur, acis hasil ngical ginjalna oge ical dipaok maling…
Eta nembe ginjal… Allah teu masihan ginjal hungkul dina badan urang… Aya oge jantung… saurna ayeuna hargina dugika 1 miliar langkung.. aya anu bade ngical jantung Bu? Atuh Wassalam… dibayarna ku kain kafan sanes ku acis… Teras dina baham urang aya waos.. Waos oge ulah dianggap remeh, upami para Ibu angkat ka dokter gigi, eta hargi gigi palsu ti mimiti anu hargina 100 rebu dugi ka anu 1 juta hijina aya Bu.. tergantung kualitas sareng bahanna.
Cobi etang aya sabaraha waos dina baham urang..? Upami aya 30 misalna… dikali 1 juta.. tos 30 juta anu aya di baham urang hungkul… Upami ngukur kana kakuatan, kuatan mana gigi asli ciptaan Allah sareng gigi palsu damelan jalmi? Lamun kangge nyaplek bubur mah mungkin sami kuatna.. cobiaan dianggo kangge nyaplek dodol.. manateuing nyangsang eta gigi palsu dina dodol…
Teu acan deui soca anu ngajantenkeun urang ayeuna tiasa ningali, kamari pribados tugas Liputan operasi katarak Sido Muncul di Tangerang.. ternyata hoyong ningali teh awis Bu.. Biaya operasi katarak teh aya anu 3 juta aya anu 5 juta aya anu langkung.. Urang mah Alhamdulillah masih dipasihan nikmat ku Allah kangge ningali.. Teu kedah operasi… berarti ku dipasihan ningalina ku Allah oge urang tos hemat 5 juta margi teu kedah operasi Katarak…
Janten.. Moal kaetang nikmat Allah anu tos di paparin ka urang.. Teu acan nyarioskeun lambung, hate, empedu, paru-paru.. Upami dietang sadayana… Tos sabara miliar anu tos dipaparin ku Allah anu aya dina badan urang… Teu Rahman sareng Rahim kumaha Allah ka urang… Bari sadayana dipasihan ku Allah gratis…
Makana dina surat Ar-Rahman Allah nyindir urang sababaraha kali.. Fabiayyi Aalaa i rabbikuma tukadzibaan.. “Maka Nikmat anu mana deui anu bade didustakeun ku anjeun?” Kumargi kitu.. Hayu urang sami-sami gunakeun nikmat badan anu sehat ieu kana jalan anu diridhai Allah… Nyaeta gunakeun kangge ibadah ka Allah SWT… Urang mulai Tahaddus binnikmah… Nga-Agungkeun Allah anu tos maparin sagala nikmat anu aya di urang ayeuna…
Sakumaha dijelaskeun ku Ibnul Qoyyim dina kitab Madarijus Salikin… Syukur teh nyaeta: Katingali bentuk nikmat eta, dina lisan hamba anu kengeng nikmat.., kujalan muji sareng ngaku yen nikmat anu dipaparin eta dongkapna ti Allah.., biasana diawali ku tahmid… Alhamdulillah ngucap rasa syukur ka Allah sateu acan ngucapkeun eta nikmat dina lisana… bari hatena makin yakin sareng makin cinta ka Allah kusabab eta nikmat, dibarengan deui ku anggota badanna ngajalankeun ibadah ka Allah ngagunakeun eta nikmat… Janten hate nyaksian, lisan Tahaddus binnikmah, badan ngalakukeun fi’liyah kujalan ibadah…
Janten ayeuna mah upami aya jalmi anu resep nyebatkan nikmat ti Allah teh, ulah langsung dianggap “Jalmi riya” anu akhirna Ghibah… nyarioskeun batur… Tapi urang kedah Husnu Dzan.. Tiasa jadi anjuena nuju Tahadduts bin ni’mah supaya urang anu ngupingkeuna tiasa nyontoan kana amal ibadah anjeuna, sakumaha perintah Allah dina Surat Ad-Dhuha ayat 11 tadi: وَأَمَّا بِنِعْمَةِ رَبِّكَ فَحَدِّثْ …..
Para Ibu rahimakumullah…
Dina praktek Tahadduts bin ni’mah ieu… kadang osok aya jalmi anu gampil Su’udzan, gampil ngarendahkeun batur… Atanapi gampil nyimpulkeun ieu jalmi riya… Padahal anu uninga kana isi hate jalmi mah Allah sanes jalmi… Anu tiasa nentukeun hiji jalmi ikhlas atanapi henteu amalan-na sanes jalmi tapi Allah… Namung kitu aya sababaraha cara anu kedah diperhatikeun ku urang anu bade Tahadduts bin ni’mah… Supaya terhindar tina Su’udzan batur diantarana:
- Hadirkeun dina manah urang niat bade ngalaksanakeun perintah Allah kujalan Tahadduts bin ni’mah.
- Lakukeun Tahadduts bin ni’mah ka jalmi anu cakeut sareng urang.. Anu tiasa dipercaya ku urang… Ulah Tahadduts bin ni’mah dipayuneun jalmi tukang hasud atanapi jalmi anu sirik ka urang.
- Langkung sae gunakeun bahasa anu umum ulah spesifik.. misalkeun dinisbatkeun ka jalmi sanes anu kengeng nikmat padahal urang oge sami kengeng eta nikmat.. ieu kangge menghindari munculna rasa hasud tinu ngupingna…
- Terakhir.. Tawakal ka Allah, urang husnudz dzan ka batur.. serahkeun urusan hate jalmi ka Allah.. Sabab anu uninga kana isi hate jalmi teu aya deui iwal ti Allah SWT.. Upami tos tahadus bin ni’mah… Percantenkeun ka Allah sadayana kujalan Tawakal sumangga teuing kumaha batur anu ngupingkeun-na bade nampi atanapi bade nyarioekeun oge… Upami nampi Alhamdulillah urang kengeng pahala, upami dina dicarioekeun baturna oga Alhamdulillah dosa urang ngirangan margi tos dicarioskeun ku batur….
Para Ibu Rahimakumullah…
Kinten-kinten naon pentingna Tahadduts bin ni’mah teh? Tahadduts bin ni’mah teh… Efekna tiasa kalebet kana diri urang nyalira supaya tiasa ningkatkeun ketauhidan urang ka Allah SWT, sareng oge efekna tiasa kaluar… Tiasa ngadorong batur supaya ngiring syukur kana nikmat ti Allah, dugika timbul dina manahna, rasa langkung cinta ka Allah sareng hoyong langkung ngaagungkeun Allah…
Sabab fitrah hate jalmi mah.. “Pasti bakal lankung bela sareng langkung nyaah ka saha oge anu langkung nyaah sareng resep masihan ka anjeuna..” Ayeuna upami diyakinkeun ku urang ka batur ku jalan Tahadduts bin ni’mah… yen Allah teh Maha Nyaah sareng Maha Masihan…, saha anu uninga.. eta jalmi bakal janten langkung bela sareng langkung cinta ka Allah… Maka urang kengeng pahala margi tos ngayakinkeun jalmi kana Maha Rahman sareng Maha Rahimna Allah…
Ngan jalmi ayeuna mah osok pabeulit, ari Tahadduts bin ni’mah anu puguh-puguh aya parentahna dina Agama… sok ararisin paur disebat ujub atawa riya.. Tapi giliran ngegembar-gemborkeun kasusah, tara isin.. Padahal ku nyebutkeun kasusah, karipuh atanapi musibah teh saenya bentuk kufur urang kana nikmatna Allah SWT…
إِنَّ الْإِنْسَانَ لِرَبِّهِ لَكَنُودٌ
“Saenyana jelema ingkar pisan, tara nganuhunkeun kan Pangeran-na (QS. Al-‘Aadiyaat: 6).
لَكَنُود dina ayat ieu ku Ibnu Katsir ditafsirkeuna nyaeta :
هو الذي يعدّ المصائب وينسى نعم الله عليه
“Nyaeta jalmi anu resep ngitung musibah sareng hilap kana nikmat Allah anu tos dipasihkeun ka anjeuna”.
Ibnu Jarir At-Thabari nafsirkeun dina Tafsir At-Thabari nukil pendapat ibnu ‘Abbas anu langkung keras deui nyaeta……:
عن ابن عباس: {إِنَّ الإنْسَانَ لِرَبِّهِ لَكَنُودٌ} قال: لربه لكفور
“Ti Ibnu ‘Abbas kakait ayat, “{إِنَّ الإنْسَانَ لِرَبِّهِ لَكَنُودٌ} hartosna sami sareng makna لربه لكفور kufur kana nikmat Allah”.
Tahadduts bin ni’mah teh salah sahiji cara supaya urang terhindar tina golongan jalmi anu kufur nikmat anu resep nyumputkeun nikmat Allah.. Sakumaha dijelaskeun dina Surat An-Nahl ayat 83:
“Aranjeuna uninga kana nikmat Allah, terus aranjeuna ingkar kana nikmat Allah sareng seuseurna lebet jalmi anu kafir.” (An-Nahl: 83).
Dina Hadits anu diriwayatkeun ku Imam Ahmad oge disebatkeun:
عَنِ النُّعْمَانِ بْنِ بَشِيرٍ قَالَ :قَالَ النَّبِيُّ صَلَّى اللَّهُ عَلَيْهِ وَسَلَّمَ عَلَى الْمِنْبَرِ مَنْ لَمْ يَشْكُرْ الْقَلِيلَ لَمْ يَشْكُرْ الْكَثِيرَ وَمَنْ لَمْ يَشْكُرْ النَّاسَ لَمْ يَشْكُرْ اللَّهَ التَّحَدُّثُ بِنِعْمَةِ اللَّهِ شُكْرٌ وَتَرْكُهَا كُفْرٌ وَالْجَمَاعَةُ رَحْمَةٌ وَالْفُرْقَةُ عَذَابٌ
Ti An-Nu’man bin Basyir nyarios, “Rasulullah saw. khutbah di luhur mimbar ngadugikeun sabdana: ‘Sing saha anu teu syukur anu saalit, artina teu tiasa syukur kanu seueur. Sing saha anu teu nganuhunkeun ka jalmi, artina teu syukur ka Allah. Saenyana nyebut-nyebut nikmat ti Allah eta disebut syukur, jeung ninggalkeun nyebut nikmat Allah saenyana kufur. Ngahiji bakal nyandak kana rahmat jeung papisah bakal ngadatangkeun adzab’.” (Musnad Imam Ahmad, no. 17721)
Sieun teu Bu… lebet kana jalmi golongan anu kufur nikmat? Kufur teh hartos syar’i-na nyaeta nutupan perkara anu leres ditutupan dugika ka teu katingali.. amalana disebat kufur, anu ngalakukeuna disebut kafir.. Tapi kade.. Upami aya anu nyebatkeun Kafir oge ulah kapancing langsung emosi… Margi Kafir teh sanes hiji, tapi seueur aya tingkatana… Teu sadayana anu disebat kafir berarti kaluar tina Islam… Sabab kafir aya tingkatana : 1. Kafir Mutlaq 2. Kafir Jumud 3. Kafir Inad (anu disebut Mu’anid) 4. Kafir Nifaq (anu disebut Munafiq), insya Allah sanes waktos urang bahas khusus masalah Kufur jeung Kafir ieu…
Mudah-mudahan aya manfaatna… Ulah ningali saha anu nyariosna… Tapi candak cariosan anu leresna, sakumaha para Ibu tara ninggali heula bujur hayamna… Lamun endog mah langsung diasakan atanapi dihuapkeun…. Hapunten bilih aya kata-kata anu kirang raos dina manah… teu aya niat anu sanes iwal ti Qul lilhaqqa walau kaana Murran… Ucapkeun anu leres sanajan pait rasana… Billahi taufik wal hidayah…. Wal ‘Afwu minkum…
السلام عليكم ورحمة الله وبركاته
